Haraldur Ingi Þorleifsson, stofnandi Ueno og starfsmaður Twitter, var með mánaðarlaun uppá rúmar 102 milljónir króna á mánuði samkvæmt álagningaskrá Ríkiskattstjóra. Eins og kom fram fyrr á árinu seldi Haraldur Ingi fyrirtæki Ueno til bandaríska stórfyrirtækisins Twitter í fyrra og samdi við félagið um að stærstur hluti kaupverðsins yrði greiddur með launagreiðslum. Ástæðan var sú að þannig borgaði hann hæstu mögulegu skattprósentu til Íslands af söluverðinu en ljóst er að Haraldur Ingi hefði getað sparað sér hundruði milljóna með því að greiða sér kaupverðið út í arð. Hann borgar um 450 milljónir króna í heildarskatt en hefði getað nánast helmingað þá upphæð með því að taka peninginn út sem arðgreiðslu.

Eins og frægt varð kaus Haraldur Ingi einnig að greiða skatt af sölunni á Íslandi í stað þess að fara eftir ráðleggingum skattaráðgjafa og færa söluandvirðið yfir í félag í einhverju af skattaskjólum heimsins.

Sagði Haraldur Ingi að með hinni drjúgu skattgreiðslu vildi hann styðja við skóla-, heilbrigðis-, og velferðarkerfi sem hafi hjálpað sér og öðru fólki úr lágtekjufjölskyldum að dafna.

Viðskiptablaðið greindi frá því í maí á þessu ári að launatekjur til eins starfsmanns í fyrirtæki Haraldar Inga næmu um 1,1 milljarði króna og því var ljóst, sem nú hefur raungerst, að frumkvöðullinn yrði í hópi skattakónga landsins í ár. Miðað við álagningaskrá má gera ráð fyrir því að Haraldur hafi haft einhverjar tekjur að auki úr öðrum áttum.

Í kjölfar sölunnar réð Haraldur Ingi sig sem starfsmann hjá Twitter en hann er mjög virkur notandi samfélagsmiðilsins þar sem hann birtir nánast daglega hugleiðingar sínar. Hann notaði miðilinn óspart til þess að gagnrýna tilraunir Elon Musk, ríkasta mann heims, til að kaupa fyrirtækið en þær áætlanir eru í uppnámi.