Fjölmiðlamaðurinn Gísli Marteinn Baldursson hefur mikinn áhuga á borgarmálunum og tjáir sig reglulega um þau enda titlar hann sjálfan sig sem „óopinber borgarfulltrúi“ á Twitter-síðu sinni. Það er einmitt á þeirri Twitter-síðu sem Gísli tjáir sig hvað mest um borgarmálin.

Í nýjustu borgarmálafærslunni sem Gísli birtir á Twitter fjallar hann lauslega um sveitarstjórnarkosningarnar í vor. Í færslunni segir hann frá því sem honum finnst að kosningarnar í Reykjavík snúist um.

„Þessi gata var einu sinni bílagata,“ segir Gísli og birtir mynd af gangstéttinni við Austurvöll. Þrátt fyrir að gatan hafi einu sinni verið ætluð bílum er hún nú ætluð fólki og á góðviðrisdögum er hægara sagt en gert að fá laust borð á veitingastöðunum við göngustíginn.

Gísli segir að ákvörðunin um að færa bílana af umræddu svæði hafi ekki farið sjálfkrafa í gegn, henni hafi verið mótmælt með „nákvæmlega sömu rökum“ og notuð eru gegn ýmsum álitamálum í borginni í dag.

„Lélegir borgarfulltrúar mótmæltu því að banna þar bíla með nákvæmlega sömu rökum og núna eru notuð gegn Borgarlínu, göngugötu á Laugavegi, þéttingu byggðar eða hverju því öðru sem gott er og fallegt í þessari borg. Það er kosið um þetta í vor.“

Í athugasemdunum við færslu Gísla um götuna spyr einn netverji hvenær þetta varð að bíllausu svæði. Gísli svarar þeirri spurningu og segir að það hafi gerst í upphafi 10. áratugs síðustu aldar. Þá segir hann að á svipuðum tíma hafi verið ákveðið að hleypa bílaumferð um Austurstrætið sem hafði verið göngugata frá árinu 1974.

Ca 1991, á svipuðum tíma og ákveðið var að hleypa bílaumferð á Austurstrætið sem hafði verið frábærlega heppnuð göngugata frá 1974.

— Gísli Marteinn (@gislimarteinn) February 22, 2022