Um miðjan marsmánuð verður aðalmeðferð fyrir Héraðsdómi Reykjavíkur í máli gegn Alsíringi á fimmtugsaldri sem býr í Reykjavík og hefur íslenska kennitölu.
Samkvæmt áreiðanlegum heimildum DV er manninum gefið að sök að hafa haft þvaglát fyrir framan börn við Þróttaravöllinn í Laugardal haustið 2020. Um lokað þinghald er að ræða þar sem börn koma við sögu en samkvæmt heimildum DV er um að ræða fjögur börn sem voru 11-12 ára þegar atvikið átti sér stað. Gerðar eru einkaréttarkröfur um miskabætur fyrir hönd barnanna sem nema mörg hundruð þúsund krónum fyrir hvert barn og samtals yfir tvær milljónir króna. Er manninum gefið að sök að hafa berað kynfæri sín og kastað af sér þagi í augsýn barnanna. Er hann sakaður um bæði hegningarlagabrot og barnaverndarlagabrot. Háttsemin er flokkuð sem blygðunarsemisbrot en ekki kynferðisbrot.
Maðurinn mun einnig vera ákærður fyrir brot gegn valdstjórninni en hann er sagður hafa hrækt á lögreglumann síðastliðið haust. Mun það atvik hafa átt sér stað fyrir lögreglustöðina á Hverfisgötu.
