Skíðamaðurinn Sturla Snær Snorrason er þessa stundina staddur í Peking, Kína en hann er hluti af íslenska hópnum sem keppir á Vetrarólympíuleikunum sem nú fara fram. Áður en Sturla fór á æfingu á laugardaginn síðasta tók hann reglubundið kórónuveirupróf, þegar hann var kominn í herbergið sitt eftir æfinguna var svo bankað á dyrnar hans.

„Þar standa ein­kennisklædd­ir ör­ygg­is­verðir og tjá mér að ég sé smitaður af kór­ónu­veirunni. Ég er svo flutt­ur beint af hót­el­inu á þenn­an spít­ala sem er sam­an­settt­ur af ein­hvers­kon­ar gáma­ein­ing­um,“ segir Sturla í samtali við mbl.is sem fjallaði um málið.

Sturla var settur í eina af þessum gámaeiningum og hefur hann dvalið þar síðan á laugardaginn. Hann segir gámaeininguna einungis vera um 8 fermetrar að stærð en í henni er ekkert nema sjúkrarúm og salerni. Þá er hann ekki með neitt sjónvarp og einu samfélagsmiðlarnir sem virka hjá honum í Kína eru Snapchat og Tinder. „Þetta eru bara fanga­búðir, það er ekk­ert flókn­ara en það,“ segir hann.

Þá segir hann að maturinn sem hann fær þarna sé ekki upp á marga fiska. „Mat­ur­inn hérna er satt best að segja ógeðsleg­ur og alltaf ís­kald­ur þegar hann kem­ur loks­ins.“

Fer í sóttkví en má keppa á leikunum

Á morgun losnar Sturla úr einangruninni en þá þarf hann að fara í vikulanga sóttkví í Ólympíuþorpinu. „Heils­an er orðin nokkuð góð en ég var ennþá slapp­ur í gær. Ég er hins veg­ar á réttri leið en á sama tíma reyndi ég að gera ein­hverj­ar æf­ing­ar í morg­un til þess að halda mér við,“ segir Sturla en hann má keppa á leikunum þrátt fyrir að hann verði í sóttkví.

Þá segir hann að markmiðin fyrir leikana hafi breyst eftir smitið. „Núna er ég fyrst og fremst að hugsa um að geta staðið í báðir lapp­ir niður braut­ina, ef maður hef­ur þá kraft­ana í það. Það hef­ur gengið á ýmsu í hausn­um á manni und­an­farna daga en ég er staðráðinn í að gera mitt allra besta í báðum grein­um,“ segir hann að lokum í samtalinu við mbl.is.