Fangi á Litla-Hrauni hefur verið ákærður af héraðssaksóknara fyrir fjögur brot gegn valdstjórninni þann 12. desember 2019.

Maðurinn á að hafa kastað hraðsuðukatli að fangavörðum Litla-Hrauns með þeim afleiðingum að einn þeirra hlaut mar, roða og eymsli aftan í hnakka. Skömmu síðar kastaði hann stól í átt að sömu fangavörðum.

Maðurinn var gestur á Heilbrigðisstofnun Suðurlands á Selfossi sama dag og þar á hann að hafa hótað lækni sínum líkamsmeiðingum ásamt því að hrækja í andlit hans og auga.

Maðurinn hélt áfram að hrækja á meðan dvölin á heilbrigðisstofnuninni stóð yfir og hrækti hann einnig í andlit fangavarðar þar. Hann var síðar færður í fangaklefa á Selfossi og þar hrækti hann í andlit og augu tveggja fangavarða í viðbót.

Af gögnum málsins að dæma er maðurinn enn fangi á Litla-Hrauni en hann var dæmdur til tveggja og hálfs árs fangelsisvistar í mars 2019 vegna líkamsárásar, einnig innan veggja fangelsisins.