Lögreglan á Norðurlandi eystra fékk í lok október þrjú mál til rannsóknar vegna gruns um þremur einstaklingum hafi verið byrlað lyf eða fíkniefni á skemmtistöðum eða í heimahúsum á Akureyri. Lögreglan greinir frá þessu á Facebook.

Í öllum tilfellunum voru tekin blóðsýni úr þeim aðilum sem tilkynntu grun um byrlun og var það gert fljótlega eftir að grunur vaknaði um brot og strax eftir að afskipti lögreglu hófust. Í færslu lögreglu segir:

„Við rannsókn á sýnunum kom í ljós að einstaklingarnir höfðu töluvert áfengismagn í blóðinu en engin merki voru um deyfilyf eða fíkniefni.“

Lögregla greinir einnig frá fjórða tilfellinu, þar sem aðili taldi að sér hafi verið byrlað. Um það segir lögregla:

„Að mati læknis var ekki talið að um byrlun væri að ræða í því tilviki og voru ekki tekin blóðsýni.“

Umræðan um byrlanir á Íslandi hefur verið nokkuð áberandi undanfarna mánuði og hafa fjölmargir stigið fram á samfélagsmiðlum og greint frá reynslu sinni af byrlunum. Harðlega var gagnrýnt að lögregla og heilbrigðisstarfsfólk hafi ítrekað neitað að rannsaka blóðsýni til að staðfesta byrlun og má kannski merkja af færslu lögreglunnar á norðurlandi eystra að einhverjar bætur hafi orðið á þessu verklagi, þó svo að í ofangreindum tilfellum hafi ekki tekist að staðfesta byrlun.

Mismunandi er hvaða efnum er beitt við byrlanir og eru sum þeirra þess eðlis að torvelt er að greina þau í blóði þegar nokkuð er liði frá því að þau voru innbyrð.