Rithöfundurinn Þorgrímur Þráinsson er annálaður bindindismaður en hann hefur aldrei tekið sopa af ágengi. Í þættinum Mannamál sem sýndur var á Hringbraut í gær spurði Sigmundur Ernir, stjórnandi þáttarins, hvers vegna Þorgrímur hefði aldrei byrjað að drekka.
„Ég er oft spurður að þessu. Ég varð nánast fyrir einelti sem ungur maður úti á lífinu, allir að bjóða mér í glas og ég sagði alltaf bara nei takk. Ég hefði örugglega verið hugrakkari, átt kærustur og gert einhverja vitleysu ef ég hefði verið að nota áfengi. Ég tók bara ákvörðun, ég veit ekki hvenær það var,“ segir Þorgrímur.
„Þegar ég fór að horfa upp á vini mína unga að aldri, ég var að keyra þá heim, hátta þá, svæfa þá og svo vöknuðu þeir morguninn eftir og spurðu hvað hefði gerst í gær. Ég nennti ekki að vera þarna. Ég er bara stoltur bindindismaður.“
Þorgrímur hefur þó ekki útilokað að hann muni fá sér í glas. „Einhvern tímann sagðirðu við mig að þú værir kannski skemmtilegri með víni,“ segir Sigmundur við hann í þættinum og þá segir Þorgrímur frá leyndarmáli.
„Ég er ekki frá því! Ég er búinn að lofa – ég má ekki segja frá þessu en ég ætla samt að gera það – ég er búinn að lofa Guðna Bergssyni vini mínum að einhvern tímann loka okkur inni í herbergi með eina myndavél, hella mig fullan og sjá hvað gerist. Ég veit ekki hvað mun gerast.“