Sheri Kelemen, 57 ára gömul kona frá New Jersey í Bandaríkjunum, hringdi í lögregluna snemma síðastliðinn mánudagsmorgun til að tilkynna um heimilisofbeldi eiginmanns síns, Gregory Keleman. „Ég get þetta ekki lengur,“ sagði hún í samtali við lögregluna samkvæmt NBC og svo útskýrði hún hvað eiginmaður hennar hafði gert henni.
Hún fór að sofa um klukkan 2 um nóttina á sunnudeginum en vaknaði nokkrum tímum seinna við barsmíðar eiginmannsins síns. Hún segir hann hafa barið sig með hafnaboltakylfu sem hann geymdi undir rúminu þeirra. Hún sagði í samtali við lögregluna að hún hafði náð að skríða inn í herbergi dóttur þeirra, háskólanemans Katherine Kelemen. Þegar hún kom inn í herbergi Katherine fann hún hana meðvitundarlausa og blóðuga.
Lögreglan og sjúkraliðar mættu á svæðið, farið var með Sheri og Katherine á sjúkrahús til aðhlynningar. Katherine var úrskurðuð látin á sjúkrahúsinu skömmu síðar en Sheri liggur enn á sjúkrahúsinu.
Í kjölfarið var byrjað að leita að Gregory en hann var búinn að yfirgefa heimilið þegar viðbragðsaðilar mættu. Hann er sagður hafa hringt í yfirmann sinn um klukkan 10 á mánudagsmorgninum til að tilkynna að hann kæmi seint í vinnuna vegna „neyðartilviks hjá fjölskyldunni“ en hann mætti aldrei í vinnuna. Daginn eftir fannst Gregory látinn í skógi stutt frá heimili sínu en talið er að hann hafi framið sjálfsvíg.
Nágranni fjölskyldunnar ræddi við fjölmiðla í kjölfar fréttaflutnings vegna málsins. Nágranninn lýsti Gregory sem „góðum manni“ og sagði að á mánudeginum hafði hann verið að monta sig af því að vera búinn að hreinsa lauf. „Síðan á mánudaginn er þetta orðið að hryllingsmynd,“ sagði nágranninn svo.
