Íslenskur kattareigandi, Kristjana, leitaði ráða inn á Facebookhópnum Kattarsamfélagið í kjölfar þess að köttur hennar, Ichigo – oftast kallaður Kisi, fór að venja sig á að naga sígarettustubba sem hann finnur á víðavangi. Velti hún fyrir sér hvort að kötturinn gæti verið haldinn nikótínfíkn og hvernig væri best að takast á við þann hvimleiða ávana.
Kristjana leitaði ráða annara kattaeigenda.
„Nikótínfíkn hjá köttum. Kötturinn minn gerir í því að naga filtera af sígarettum sem hann finnur í nágrenninu. (Reykir enginn á heimilinu) Hann hefur verið einn af þessum sem veiðir allt annað en mýs og fugla. Hann er að koma stoltur heim með vettlinga, dömubindi, plastpoka, hrúgu af laufum og fleira. En uppá síðkastið er hann endalaust með sígarettur. Feldurinn hans er að verða ljótur og hann er að rífa heilu klærnar af sér á kattaklórunni og tengi ég það við fíknina hans. Hvað get ég gert annað en að loka dýrið inni?“
Í athugasemdum er henni bent á að nikótín geti verið stórhættulegt köttum og að best væri að fara með Kisa til dýralæknis. Aðrir benda á að mögulega sé best að afgirða fyrir hann afdrep á svölum eða í garði svo hann komist aðeins út, en þó ekki á svæði þar sem sígarettustubbum hefur verið hent.
Kristjana þakkar ráðin og segir að Kisi sé kominn í meðferð.
„Takk allir. Hann er kominn í meðferð og fær ekki að fara út. Heyri í dýralækni í dag til að skoða hann.“
Það er vel þekkt í dag að sígarettur og sígarettureykur er ekki hollur okkur mannfólkinu. Því er ekki erfitt að sjá fyrir sér hvaða áhrif slíkt hefur á gæludýr á borð við ketti sem eru töluvert minni en mannfólkið.
Nikótín getur valdið alvarlegri eitrun hjá dýrum. Þó svo kettir séu að leika sér með aðeins stubb af sígarettu eða filterinn úr slíkum þá er enn hægt að finna eitthvað magn af nikótíni í þeim sem svo berst inn í líkama kattar ef hann borðar stubbinn, eða nagar hann.
Einkenni nikótíneitrunar hjá köttum geta verið:
Sem betur fer er talið að gæludýrum, líkt og mannfólki þyki sígarettur ekkert sérlega bragðgóðar en forvitnir og leikglaðir kettir geta þó litið á sígarettustubba sem upplagt leikfang, nagdót eða fórn til að færa eigendum sínum. Kettir gætu líka velt sér upp úr sígarettustubbum og innbyrt svo nikótín úr þeim þegar þeir þrífa feldinn sinn. Sérstaklega geta kettir sótt í mentól sígarettur þar sem mentól getur framkallað svipuð einkenni hjá þeim og kattarmynta (e. catnip). Nikótín er ávanabindandi og það getur líka átt við um ketti.
Því er ágætt að hafa þetta á bak við eyrað þegar kemur að því að losa sig við leyfar sígarettureykinga, nikótínpúða eða annað þvíumlíkt. Því það eru litlar verur á ferð, sem geta orðið fyrir eitrun. Eins geta óbeinar reykingar haft neikvæð áhrif á heilsu katta og jafnvel valdið krabbameini.
Í samtali við DV segir eigandi Kisa, Kristjana, að kisi sé ögn sár að komast ekki út en annars hress.
