Lögreglan á höfuðborgarsvæðinu rannsakar nú kæru á hendur kennara og þremur starfsmönnum grunnskóla á höfuðborgarsvæðinu en þeir voru kærðir fyrir meint brot á hegningarlögum og barnalögum.

Fréttablaðið skýrir frá þessu. Fram kemur að barnið hafi að minnsta kosti tvisvar verið lokað eitt inni í skólanum.

Grímur Grímsson, yfirlögregluþjónn og yfirmaður miðlægrar rannsóknardeildar Lögreglunnar á höfuðborgarsvæðinu, staðfesti að embættinu hafi borist kæra varðandi ofbeldi gegn barni í skóla á höfuðborgarsvæðinu. Hann sagði að rannsókn væri hafin en ekki verði veittar frekari upplýsingar um gang hennar að svo komnu máli.

Umboðsmaður Alþingis er nú að skoða mál er varða innilokanir barna og aðskilnað þeirra frá samnemendum sínum. Hann ítrekaði fyrirspurn sína frá því í fyrr í síðasta mánuði til menntamálaráðuneytisins og fjögurra sveitarfélaga á höfuðborgarsvæðinu og Akureyri um mál af þessu tagi. Umboðsmanni höfðu borist ábendingar um slík mál. Frestur til að svara umboðsmanni rann út í gær.