Arnar Grétarsson, fótboltaþjálfari til margra ára og frambjóðandi Viðreisnar í Kópavogi, var gestur Helga Fannars í nýjasta þætti af Íþróttavikunni.

Hermann Hreiðarsson, þjálfari Vals, kom sér í fréttirnar fyrir átök eftir tapið gegn KR á dögunum. Er honum gefið að sök að hafa veitt Ástbirni Þórðarsyni, leikmanni KR, högg í leikmannagöngunum eftir leik.

„Þegar þú ert kominn inn í fótboltann verður þú að geta stoppað,“ sagði Arnar, sem þekkir Hermann vel, voru þeir til að mynda liðsfélagar í íslenska landsliðinu um árabil.

„Ég man þegar Hemmi var að þjálfa í Árbænum fyrir einhverjum árum og fékk ÍBV. Þar var einhver stjórnarmaður í ÍBV brjálaður, hann var tekinn hálstaki og vildi gera veður út af því af því hann var brjálaður yfir því. Menn þurfa að passa sig. Ef þetta er rétt, sem ég tel ágætis líkur á, þekkjandi drenginn, þá á þetta ekki samleið. Eftir leik á þetta að vera búið.“

Hann hrósar KR-ingum fyrir að hafa ekki ákveðið að taka málið lengra, þó innistaða hafi hugsanlega verið fyrir því.

„Mér finnst flott hjá KR-ingum að vera ekki að búa til meira vesen. Þeir gætu alveg búið til meira vesen fyrir Val. Það er smá rígur þarna á milli, ég þekki það aðeins. Svo það kemur á óvart að þeir séu ekki búnir að gera veður út af þessu.

Hemmi er bara svona. Hann er gaur. Hann er ekkert að meina neitt illt með þessu, gleymir sér bara.“

Nánar í spilaranum.