Hraun er nú tekið að renna niður í Nátthaga. Þaðan er nokkuð greið leið fyrir hraunið alveg niður að Suðurstrandarvegi. Eins og sjá má á meðfylgjandi korti hér neðst í fréttinni er þó nokkur spotti eftir fyrir hraunið að renna áður en veginum er ógnað og ætti því einhver tími að vera til stefnu að bregðast við, sé það ætlun stjórnvalda. Varnargarðar sem reistur höfðu verið í dalnum ofan við Nátthaga brustu í nótt. Hlutverk þeirra var einmitt að hindra flæði hrauns niður í Nátthaga.

Meðfylgjandi myndbönd fangaði Elvar Þór Ólafsson, en hann var á ferð um svæðið nú í morgun. DV tók Elvar á tal. „Við vorum að labba leið A þarna að gosinu og svo ákváðum við að kíkja þarna á þessa varnargarða sem höfðu verið í umræðunni,“ sagði Elvar. Við þeim blasti þá hrauntungan á leið niður Nátthagahlíðar og náði Elvar þessum ótrúlegu myndum af flæðinu.

„Þetta er bara magnaður andskoti,“ sagði Elvar sem bersýnilega var uppnuminn af krafti náttúrunnar. Hann viðurkenndi fúslega að það hefði verið ógnvænlegt að sjá hraunið flæða þarna af svo miklum hraða og krafti. „Við fundum vel hitann af þessu.“

Þegar blaðamaður DV náði tal af honum stóð Elvar í Nátthagadal þar sem hann stóð og horfði á flæðið renna niður Nátthagahlíðar.

Myndbönd Elvars og kort af svæðinu má sjá hér að neðan. Myndböndin eru birt með góðfúslegu leyfi Elvars.