Lögreglustjórinn á Vestfjörðum hefur birt fyrirkall og ákæru í Lögbirtingablaðinu á hendur erlendum manni sem býr á Bíldudal. Verður réttað yfir honum vegna ofbeldisbrots sem hann er sagður hafa framið um miðjan febrúar. Fyrirtaka í málinu verður mánudaginn 28. júní fyrir Héraðsdómi Vestfjarða. Maðurinn finnst ekki og því er tilkynningin birt. Ef hann mætir ekki til dóms verður réttað yfir honum fjarstöddum.
Maðurinn rataði í fréttir í febrúar vegna framferðis síns á Bíldudal. Á vef Fréttablaðsins sagði:
„Að því er kemur fram í færslunni var lögregla fyrst kölluð til að íbúðarhúsinu sunnudagskvöldið 14. febrúar síðastliðinn þar sem átök höfðu átt sér stað en einn maður reyndist þar slasaður og með skerta meðvitund.
Hann var í kjölfarið fluttur með þyrlu Landhelgisgæslunnar á sjúkrahús í Reykjavík en hann reyndist ekki vera með alvarlega áverka. Sá sem var grunaður um að valda árásinni var færður í fangageymslu á Patreksfirði en sleppt lausum daginn eftir.“
Síðan greinir frá því að sama dag og manninum var sleppt úr varðhaldi hafi hann ógnað manni með hnífi og verið handtekinn aftur.
Í ákærunni er aðeins þetta síðara atvik tilgreint og maðurinn aðeins ákærður vegna þess. Í ákærunni segir að hann hafi mánudaginn 15. febrúar hótað manni lífláti á heimili ákærða með því að draga upp hníf, ota hnífnum að manninum og í kjölfarið kasta hnífnum þannig að hann lenti í gólfinu nálægt fótum þolandans. Hafi hann jafnframt sagt þolandanum að hann gæti drepið hann ef hann vildi. Er þess krafist að hinn ákærði verði dæmdur til refsingar og greiðslu alls sakarkostnaðar.
