Jarðskjálfti, af stærðinni 5,0, varð við Fagradalsfjall á Reykjanesi klukkan 23.36 í gærkvöldi. Skjálftinn fannst vel víða á Suðvesturhorni landsins. Fjöldi eftirskjálfta hafa mælst, þeir stærstu 3,5 klukkan 00.08 og 3,4 klukkan 00.55 og 03.09.

Þetta kemur fram á vef Veðurstofunnar. Þar segir einnig að tilkynningar hafi borist um að eftirskjálftarnir hafi fundist vel á Suðvesturhorninu. Einnig hefur Veðurstofan fengið tilkynningar um grjóthrun í Festarfjalli sem er um 6 km SV af upptökum skjálftans.

Í tilkynningu frá Veðurstofunni segir að ekki sé hægt að útiloka annan stóran skjálfta í þessari hrinu.

Uppfært klukkan 06:10 – Skjálfti upp á 4,6 varð við Fagradalsfjall klukkan 05.46 að því er segir í tilkynningu frá Veðurstofunni.