Forsala á Þjóðhátíð í Vestmannaeyjum hófst í vetur og hafa eflaust einhverjir þegar tryggt sér miða en formaður Þjóðhátíðarnefndar vill ekki upplýsa hversu margir miðar hafa verið seldir. En miðakaupendur þurfa ekki að hafa áhyggjur því formaðurinn segir að miðarnir verði endurgreiddir ef Þjóðhátíð fellur niður.

Fréttablaðið skýrir frá þessu í dag. Þar er haft eftir Herði Orra Grettissyni, formanni Þjóðhátíðarnefndar, að þar á bæ bíði fólk átekta varðandi hátíðina. Mikil óvissa ríkir um í hvaða formi hátíðin verður vegna fjöldatakmarkana, vegna kórónuveirufaraldursins, sem verða væntanlega enn í gildi um verslunarmannahelgina þegar halda á hátíðina.

„Ef Þjóðhátíð verður ekki haldin verða miðarnir bara endurgreiddir. Það er einfaldlega skýrt í neytendalögum að ef þú kaupir þér þjónustu eða eitthvað slíkt og hún er ekki innt af hendi þá áttu rétt á endurgreiðslu, þannig að það er alveg ljóst.“

Hefur Fréttablaðið eftir Herði. Aðspurður sagði hann að Þjóðhátíðarnefnd hafi bolmagn til að endurgreiða selda miða því útgjöldin hafi ekki verið mikil fram að þessu, styrktarsamningar komi þar til hjálpar sem og að Þjóðhátíðarnefnd eigi sjálf miðasölukerfið.

„Eins og staðan er í dag er útlagður kostnaður vegna Þjóðhátíðarinnar 2020 minniháttar og nánast enginn.“