Veggurinn frægi við sjávarútvegshúsið varð tilefni mikillar umræðu á samfélagsmiðlum og í fjölmiðlum í gær. Veggurinn hefur um langa hríð staðið útkrotaður og illa við haldið. Um helgina gerðu sér einhverjir leik að því að mála yfir veggjakrotið með svartri málningu og mála svo: „Hvar er nýja stjórnarskráin?“ með hvítum lit á svartan bakgrunn. Á mánudaginn birtust svo menn með háþrýstidælur og hófu að hreinsa skilaboðin af.

Skilaboðin ættu að vera orðin borgarbúum kunn en þau hafa birst víða á síðustu misserum og er bersýnilega um samstillt átak að ræða til þess að vekja athygli á nýrri stjórnarskránni sem samþykkt var af stjórnlagaráði sem skipað var árið 2011. Málið er auðvitað rammpólitískt.

Það hversu skjótt var brugðist við þessu tiltekna veggjakroti vakti auðvitað athygli, enda veggurinn útkrotaður til margra ára. Höfðu gárungar á því orð í gær að með þvættinum hlyti Norðurlandamet í viðbragðshraða stjórnvalda við veggjakroti að vera slegið. Hvort það sé satt verður seint sannað, en ljóst er að veggurinn hefur sjaldan verið jafn hreinn og nú.

Vinna við hreinsunina stóð enn yfir í morgun þegar blaðamaður DV átti leið hjá. Gera má ráð fyrir að verkið verði klárað í dag, en hreinsunin virðist seinleg í framkvæmd, eins og sjá má á myndbandi af hreinsunarstörfum hér að neðan.