Í minningargrein um Elías í Morgunblaðinu er farið yfir ævina hans en Elías var knattspyrnumaður á sínum yngri árum. Hann var fyrrverandi aðalbókari í Héðni og gegndi trúnaðarstörfum fyrir Val og Knattspyrnusamband Íslands.
Elías fæddist í Reykjavík þann 19. janúar árið 1938 og ólst upp í Vesturbænum með foreldrum sínum Hergeiri Elíassyni togaraskipstjóra og Ragnheiði G. Þórðardóttur húsfreyju.
Elías gekk í Verzlunarskóla Íslands og útskrifaðist þaðan árið 1957 og hóf í kjölfarið störf við Útvegsbankann. Árið 1967 fór hann síðan að vinna í Vélsmiðjunni Héðni og vann þar til ársins 2008, mestmegnis sem yfirbókari fyrirtækisins.
Eins og áður segir var Elías knattspyrnumaður. Hann byrjaði að æfa með KR en gekk síðan í Val og æfði og keppti með félaginu í öllum aldurshópum. Elías varð nokkrum sinnum Íslandsmeistari og Reykjavíkurmeistari í yngri flokkum. Hann lék einnig 100 leiki með meistaraflokki á árunum 1956 til 1962 og varð Íslandsmeistari árið 1956.
Elías giftist Valgerði Önnu Jónasdóttur og eignuðust þau fjögur börn saman, Hergeir, Margréti, Ragnheiði og Jónas.
