Stöndum saman gegn sjálfsvígum er yfirskrift opins málþings í tilefni Alþjóðlegs forvarnardags sjálfsvíga í húsakynnum Decode við Sturlugötu milli kl. 15 og 17 mánudaginn 10. september. Þar verður meðal annars fjallað um forvarnir gegn sjálfsvígum, geðrækt, tíðni sjálfsvígstilrauna meðal ungs fólks og starfsemi Píetasamtakanna á Íslandi. Kyrrðarstundir í minningu þeirra sem tekið hafa eigið líf verða haldnar í Dómkirkjunni, Akureyrarkirkju, Egilsstaðakirkju og Selfosskirkju kl. 20 mánudaginn 10. september og í Útskálakirkju kl. 20 sunnudaginn 9. september. Allir eru velkomnir á viðburðina og er aðgangur ókeypis.
Málþingið hefst með opnunarávarpi Svandísar Svavarsdóttur, heilbrigðisráðherra. Þar mun hún segja frá áformum stjórnvalda um framkvæmd nýrrar sjálfsvígsforvarnarstefnu. Í stefnunni eru meðal annars lagðar til aðgerðir til að draga úr áhættu á sjálfsvígum, bæta þjónustu, efla seiglu, styðja aðstandendur og takmarka aðgengi að hættulegum efnum, hlutum og aðstæðum. Aðaláhersla er lögð á að skapa vettvang fyrir þekkingu og forvarnir á sviði sjálfsvíga á Íslandi.
Í kjölfar ávarps heilbrigðisráðherra munu Sigrún Daníelsdóttir, verkefnisstjóri geðræktar hjá Embætti landlæknis, og Ingibjörg Eva Þórisdóttir, sérfræðingur hjá Rannsóknum og greiningu fjalla um niðurstöður kannana á vegum Rannsóknar og greiningar um sjálfsvígshugsanir og sjálfsvígstilraunir ungs fólks á Íslandi. Eftir erindið mun Edda Arndal, forstöðumaður Píeta á Íslandi, fjalla um reynsluna af fyrstu sex mánuðunum í starfi Píeta á Íslandi. Píeta veitir einstaklingum í sjálfsvígsvanda og aðstandendum þeirra stuðning og ráðgjöf. Að loknu kaffihléi slær Alda Karen Hjaltalín, ráðgjafi og fyrirlesari frá New York, botn í málþingið með erindi undir yfirskriftinni Hugurinn þinn. Þar fjallar hún um geðrækt, heilaræktunarstöðvar og tengsl hugar og líkama. Fundarstjóri á málþinginu verður Þorsteinn Guðmundsson, leikari og annar tveggja verkefnisstjóra Bataskóla Íslands.
Efnt verður til kyrrðarstundar í Dómkirkjunni og nokkrum öðrum kirkjum á landsbyggðinni í tilefni forvarnardagsins. Í Dómkirkjunni mun sr. Jóna Hrönn Bolladóttir flytja hugvekju, Heiðrún Jensdóttir, aðstandandi, segja frá reynslu sinni af því að missa nákominn ættingja í sjálfsvígi og Eyþór Ingi Gunnlaugsson flytja tónlistaratriði. Jónas Þórir mun leika á orgel kirkjunnar. Í lok kyrrðarstundarinnar verður kveikt á kertum til minningar um látna ástvini. Frekar upplýsingar um viðburðina er að finna á www.sorg.is
Alþjóða heilbrigðismálastofnunin hvetur þjóðir heims til að efna til dagskrár í tilefni af Alþjóðlegum forvarnardegi sjálfsvíga þann 10. september ár hvert. Þema dagsins að þessu sinni er Stöndum saman gegn sjálfsvígum og felur í sér hvatningu til samfélagsins í heild um að beita sér sameiginlega fyrir því að fækka sjálfsvígum. Árlega taka um 40 manns sitt eigið líf á Íslandi og er sá fjöldi nokkuð hærri en í nágrannalöndunum.
Eftirtaldir aðilar standa að dagskránni undir merkjum 10sept hópsins hér á landi: Embætti landlæknis, Geðhjálp, Heilsugæsla höfuðborgarsvæðisins, Hugarafl, Landspítalinn – geðsvið, Minningarsjóður Orra Ómarssonar, Ný dögun, stuðningur í sorg, Píeta samtökin, Rauði krossinn og Þjóðkirkjan.
Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið, númerið er ókeypis og opið allan sólarhringinn.
Nánari upplýsingar hér: https://www.raudikrossinn.is/hvad-gerum-vid/hjalparsiminn-1717
Píeta samtökin bjóða einnig upp á þjónustu í síma 552-2218 fyrir fólk í sjálfsvígshættu og með sjálfsskaðahegðun.
