Linkin Park-söngvarinn Chester Bennington er látinn. Hann framdi sjálfsmorð í íbúð sinni í Kaliforníu í morgun. Frá þessu er greint á vef Sky News.
Bennington var giftur og átti sex börn. Hann var aðeins 41 árs. Bennington þótti afbragðssöngvari. Þá vakti mikla athygli fyrir um 10 árum þegar hann greindi frá misnotkun sem hann varð fyrir í æsku af eldri manni. Þar sem hann hafði engan til að leita til fór hann að semja ljóð og lagatexta til þess að reyna að vinna sig út úr sársaukanum.
Síðar notaði hann textana með fyrstu hljómsveit sinni Grey Daze. Hann sagðist hafa fengið aukið sjálfstraust í gegnum tónlistina sína og með henni hefði hann náð ákveðnum bata.