Íbúðaverð á landinu öllu hefur hækkað um meira en eitt prósent undanfarna sjö mánuði. Þetta kemur fram í Greiningu Íslandsbanka. Á þessum sjö mánuðum hefur húsnæðisverð hækkað um tæp 13 prósent. Það þýðir að íbúð sem kostaði í haust 30 milljónir hefur hækkað um tæpar fjórar milljónir króna, að jafnaði.

Fram kemur að þrátt fyrir að íbúðaverð á höfuðborgarsvæðinu hafi hækkað í verði sé hækkunin á landsbyggðinni hraðari. „Nam hækkunin þar nú í febrúar 2,4% samanborið við 1,6% hækkun á íbúðum í fjölbýli og 1,4% hækun á sérbýli á höfuðborgarsvæðinu.“

Í greiningunni segir að íbúðaverð hafi hækkað um 16% síðasta árið en hækkunin hefur ekki verið jafn hröð síðan fyrir hrun. „Yfir síðustu tólf mánuði hefur raunverð íbúðarhúsnæðis hækkað um 13,8% sem er mesta raunverðshækkun íbúðarhúsæðis sem mælst hefur síðan í apríl 2006.“ Raunverð íbúða sé orðið sögulega hátt og nálægt því sem það fór hæðst í síðustu uppsveiflu.

Íslandsbanki segir að ástæður þessara hækkuna séu mikil hækkun launa, fjölgun starfa, vöxtur deilihagkerfisins og lítið framboð nýbygginga. Íbúðamarkaðurinn beri mörg einkenni þenslu.
Fram kemur að aldrei hafi færri íbúðir verið á söluskrá og meðalsölutími hefur aldrei verið styttri.