Tónlistarkonan Greta Salóme hneig niður á flugvelli fyrir stuttu með nýrnasýkingu. Greta hefur varla staldrað við til að anda síðustu ár og flýgur heimshorna á milli í tónlistarsköpun sinni, þar sem hún hefur átt góðu gengi að fagna. DV fannst því tilvalið að leggja tarotspil fyrir Gretu en lesendum er bent á að þeir geta sjálfir dregið tarotspil á vef DV.
Fyrsta spilið sem kemur upp hjá Gretu er 6 bikarar. Minningar úr fortíðinni leita á Gretu og þær ylja. Þær tengjast gömlum vini eða ástvini sem verður á vegi tónlistarkonunnar sem Greta tekur fagnandi. Sú hlýja og samkennd sem býr innra með Gretu vekur gleði í hjarta vinarins og um leið er Greta minnt á að gefa mikið af sér því það eflir sjálfsöryggi hennar. Hún getur hrint ótrúlegum hlutum í framkvæmd með góðverkum sínum.
Svo er það Dómurinn. Það spil táknar einnig fortíðarhugsanir Gretu. Það tengist þessum fyrrnefnda vini og atviki sem Greta hefði viljað sjá spilast á annan hátt. Hún gerði hins vegar það rétta í stöðunni þá og má ekki dvelja of lengi við mistök fortíðarinnar. Það er gott hjá henni að horfa yfir farinn veg á sjálfsgagnrýninn hátt, en síðan þarf hún að horfa fram á við. Nýr kafli bíður Gretu þegar hún hefur gert upp fortíðina, því allt sem hún rannsakar í lífinu leiðir hana áfram og upp.
Loks er það Stríðsvagninn. Greta veit hvað hún vill fá út úr lífinu, hún kann að setja sér markmið og hún veit hvar tækifærin liggja. Innra með henni er metnaður og drifkraftur sem er sjaldséður og hún er óhrædd við að fara ótroðnar slóðir. Greta nýtir oft ekki hæfileika sína rétt og hún þarf að leysa þann vanda. Eins og er finnst henni eins og hún eigi ekki um neitt að velja og að hennar vegur sé nú ákveðinn fyrir lífstíð. Það er ekki svo. Hún má hafa augun opin fyrir nýjum tækifærum svo hún missi ekki af þeim, en að sama skapi verður hún að meta vel kosti og galla þeirra tækifæra sem hún grípur. Greta á stundum erfitt með mannleg samskipti og það besta fyrir hana er að skilja á milli einkalífs og vinnu, læra að miðla málum og takast á við vandamál um leið og þau koma upp.
