Telma Ýr Birgisdóttir komst að því að sonur hennar þyrfti að nota gleraugu þegar hann var einungis 6 vikna gamall. Þegar hann var orðin fjögurra og hálfs mánaða gamall fékk hann sín fyrstu gleraugu og kostuðu þau hjónin 76.200 krónur með afslætti.

Við gerum okkur alveg grein fyrir því að þegar við eignumst börn þá vitum við að allskonar kostnaður getur fylgt með en mér finnst þetta alls ekki í lagi,

segir Telma í samtali við Bleikt.is

Börn efnalítilla foreldra ekki rétt á gleraugum

Þjónustu- og þekkingarmiðstöð fyrir blinda, sjónskerta og einstaklinga með samþætta sjón- og heyrnarskerðingu niðurgreiðir gler í barnagleraugu og fengu þau hjónin 9000 krónur til baka.

Eiga þá börn efnalítilla foreldra ekki rétt á gleraugum? Það ætti að vera meiri niðurgreiðsla á þessu þar sem við viljum að börn fái jöfn tækifæri, til dæmis til náms.

Sleppa því að kaupa gleraugu

Telma setti inn færslu á Facebook sem vakti athygli og segist hún hafa fengið nokkur skilaboð frá mæðrum sem slepptu því að kaupa gleraugu handa börnunum sínum í einhvern tíma þar sem útgjöldin eru svo há.

Mér finnst þetta mjög sorglegt og finnst mér að niðurgreiðslan eigi að vera hækkuð, hugsanlega með niðurgreiðslum úr sjúkratryggingum og ákvað ég því að safna undirskriftum til þess að koma þessu áfram.

Telma tók við undirskriftarlista í gær sem hægt er að nálgast HÉR og skrifa undir.