Framtíð Vancouver Whitecaps í MLS deildinni er í mikilli óvissu, en félagið gæti verið flutt til Las Vegas samkvæmt nýjustu fréttum vestanhafs.

Eigendur MLS ræddu stöðu félagsins á fundi fyrr í mánuðinum vegna þess sem kallað er „viðvarandi rekstrarvandi“ við að halda liðinu í Kanada. Whitecaps hefur verið til sölu frá því í desember 2024, en ekki hefur tekist að finna kaupanda sem vill halda félaginu í Vancouver.

Stærsta vandamálið snýr að heimavellinum BC Place, sem hefur verið talinn óhentugur vegna þess hversu oft þarf að deila honum með öðrum viðburðum.

Samkvæmt fréttum var mögulegur flutningur til Las Vegas helsti kosturinn sem ræddur var, og MLS hefur þegar átt samtöl við hóp sem vill koma liði á þann markað.

Þetta kemur þrátt fyrir góðan árangur Whitecaps á vellinum, en liðið komst meðal annars í úrslit bæði CONCACAF Champions Cup og MLS-bikarsins á síðasta ári.

Stuðningsmenn hafa mótmælt hugmyndinni harðlega og mætt með „Save the Caps“-skilti á leiki félagsins.