Það er ár síðan að Hekla Elísabet Aðalsteinsdóttir, sérfræðingur í samfélagsmiðlum, lenti í vægast sagt leiðinlegri uppákomu í Hörpu. Hún mætti þangað til að horfa á tónlistarmanninn Devonté Hynes á Airwaves í fyrra.
„Ég stend þarna og allt í einu byrjar að gusast út úr mér ælan, bara Heklugos, ótrúlegt magn og ótrúlegur kraftur þar sem ég stend úti í horni í Flóa í Hörpu fyrir framan hundruð manna,“ sagði Hekla á sínum tíma um atvikið í Morgunþættinum Múslí á Útvarp 101.
Sjá einnig: Ferð Heklu í Hörpu endaði með ósköpum
Hekla var ekki búin að snerta áfengi alla helgina heldur var um, svo hún hélt, að ræða mjög illa tímasetta gubbupest. „Ég hugsaði: Þetta er lágpunkturinn í mínu lífi. Ég held utan um ruslafötu, er út ötuð í gubbi og það eru fimm mínútur í að Blood Orange stigi á svið. Ekki í mínum villtustu martröðum hefði svona gerst,“ sagði hún.
Í dag held ég upp á eins árs afmæli þessa mikla lífsviðburðar 🎉#airwaves2018 https://t.co/IR15fdgFuD
— Hekla Elísabet Aðalsteinsdóttir (@HeklaElisabet) November 11, 2019
Mannlegur harmleikur
Það er komið ár síðan að atvikið átti sér stað og í tilefni dagsins ritar Hekla svokallaðan uppgjörspistil. Hún deilir honum á Twitter.
„Nú er ár liðið frá þessum mannlega harmleik og því verður ekki hjá því komist að líta yfir farinn veg, taka stöðuna og endurmeta hlutina,“ segir Hekla.
„Ég er ekki búin að fyrirgefa örlögunum fyrir að hafa vegið svona mjög að öllu sem mér var kært […] Ég þarf að minnsta kosti sjö ár í viðbót af sjálfsvinnu til að öðlast æðruleysið sem þarf til að sætta mig við niðurlæginguna, komast yfir beiskjuna og fyrirgefa meltingarkerfinu mínu fyrir að hafa brugðist mér á ögurstundu.“
Ekki var um venjulega ælupest að ræða, heldur kom í ljós að Hekla var með gallstein. Hún fékk því miður ekki að eiga hann.
„Þá hefur gallsteinninn, sem í ljós kom að var valdur að þessu atviki og mörgum svipuðum í kjölfarið, verið fjarlægður. Ég fékk ekki að eiga hann en svæfingalæknirinn sendi mér mynd af honum í einkaskilaboðum á Twitter. Hann var stærri en margar myntir sem ég hef séð og minni en sumar plánetur. Hann hlaut nafnið Gannes Gallsteinn Gissurarson. Bölvuð sé minning hans,“ segir Hekla.
„Er ég betri manneskja eftir þessa lífsreynslu? Nei. En ég er auðmjúk. Auðmjúk eins og ungabarn sem veit fátt annað en að það getur skitið í bleyjuna sína hvar og hvenær sem er. Og það er gott. Þroskandi. Heldur mér á jörðinni.“
Ég ritaði uppgjörspistil í tilefni dagsins pic.twitter.com/Z0bpjxqkGF
— Hekla Elísabet Aðalsteinsdóttir (@HeklaElisabet) November 11, 2019