Fegurðardrottningin og bloggarinn Fanney Ingvarsdóttir opinberaði það í bloggi á Trendnet fyrr í kvöld að hún hafi verið að vinna að sinni eigin fatalínu undanfarna mánuði.

„Síðasta vor, eða nánar tiltekið í maí í fyrra, var fyrsti undirbúningsfundur formlega haldinn svo ferlið er því orðið ansi langt og margir stórskemmtilegir mánuðir af vinnu að baki. Hingað til hefur þetta verið algjört „leyniverkefni“ og hef ég í allan þennan tíma haldið því fyrir sjálfa mig og mína nánustu,“ skrifar Fanney. Leyniverkefnið er ný fatalína sem Fanney vann með Gallerí 17 og heitir MOSS X FANNEY INGVARS. Fanney hefur strítt aðdáendum sínum á samfélagsmiðlum með alls kyns dulum skilaboðum síðustu daga.

„Þið hafið eflaust mörg hver tekið eftir smá „tease-i“ á samfélagsmiðlum undanfarna daga en ég hef verið að klæðast og birta myndir af mér í flíkum úr línunni. Það reyndist á endanum mjög erfitt því mér bárust óteljandi fyrirspurnir um flíkurnar og þótti mér mjög erfitt að geta ekki svarað ykkur með fullnægjandi svörum, þó ég væri að sjálfsögðu óendanlega þakklát að finna fyrir áhuganum! Nú get ég loksins skýlt mér á bakvið það en þessar flíkur tilheyra sumsé fatalínunni minni, MOSS X FANNEY INGVARS sem ég er ofsalega stolt af.“

Nýja fatalínan fer í sölu þann 11. apríl næstkomandi, en þessi tímamót eru ansi tilfinningaþrungin fyrir Fanneyju.

„Undanfarna daga hafa allar heimsins tilfinningar komið yfir mig en núna get ég ekki annað en brosað út að eyrum. Ég varð einfaldlega smá meyr af stolti þegar ég sá allar flíkurnar mínar hangandi saman á slá í fyrsta sinn í síðustu viku.“

Átján flíkur eru í línunni en hver flík hlýtur nafn sem er sérstakt í huga fegurðardrottningarinnar.

„Allar flíkurnar skírði ég í höfuðið á mínum nánustu vinkonum en mér þótti það viðeigandi þar sem þær voru mér afar mikilvægur stuðningur í gegnum þetta ferli. Alltaf tilbúnar að gefa mér ráðleggingar þegar ég þurfti og eins gáfu mér nauðsynleg „pepp“ á þeim stundum sem ég leyfði mér að efast. Fyrir það verð ég ævinlega þakklát og fyrir vikið langaði mig að skíra flíkurnar mínar í höfuðið á þeim,“ skrifar Fanney og lofar nánari upplýsingum um línuna á næstu dögum.