Leikkonan Gwyneth Paltrow leggur gríðarlega mikið upp úr heilsusamlegu líferni og að sumra áliti gengur hún þar stundum lengra en góðu hófi gegnir. Nýlega lýsti hún því yfir að hún væri hætt að borða kolkrabba þar sem þeir væru svo gáfaðir!
Joan Collins tjáði sig nýlega um lífsstíl Paltrow. „Allt þetta tal um að hún borði ekkert í viku og drekki bara geitamjólk, hvað á það að þýða?“ sagði hin 83 ára gamla leikkona. „Ég sé þetta fólk með sína grænu safa, grænkál og kínóa sem er á bragðið eins og pappír. Grænt te er viðbjóðslegt. Það er eins og blek.“
Paltrow hefur ekki viljað tjá sig um þessi orð Collins. Fyrir nokkrum árum lenti Paltrow og Kate Moss saman. Þær voru meðal gesta í afmæli auðkýfings. Paltrow fór skyndilega að skokka og Moss kallaði til hennar af hverju hún væri að því. Paltrow er sögð hafa sagt: „Það er til að ég líti ekki út eins og þú þegar ég verð gömul.“ Moss brást við með því að kasta frönskum kartöflum að Paltrow og hrópaði: Af hverju borðarðu ekki eitthvað af andskotans kolvetnum.“
