Fjölnir Guðmannsson, læknir á Akureyri, lét draum sinn til áratuga rætast um síðustu helgi þegar hann tók þátt í torfærukeppni á bílnum sínum, Evu. Bílinn nefndi Fjölnir í höfuðið á kærustunni sinni, Evu Hilmarsdóttur.

Fjölnir segist hafa velt því fyrir sér í mörg ár að kaupa torfærubíl. Bílinn sem hann síðan keypti hafði hann fyrst séð á sölu fyrir um tveimur árum og haft á honum áhuga síðan. Hann hafi ekki treyst sér til að kaupa bílinn þá, verið nýbúinn í læknanáminu. Nú hafi hann hins vegar verið að ljúka sérnámi sínu og ákveðið að stökkva til. „Það má eiginlega segja að ég hafi keypt hann í svona útskriftargjöf fyrir sjálfan mig. Hann hét upphaflega Frissi fríski, þessi bíll og núna um síðustu helgi voru tuttugu ár frá því hann fór í sína fyrstu torfæru, einmitt hér á Akureyri.“

En hvað kemur til að heimilislæknir á fertugsaldri, sem aldrei áður hefur komið nálægt mótorsporti, stekkur til og kaupir torfærubíl? „Það var strákurinn í mér, hann langaði í bílinn. Þetta er draumur sem hefur fylgt mér frá æsku og þegar ég komst í aðstöðu til að láta hann rætast þá var bara að stökkva til. Það er örugglega skemmtilegra að gera hlutina, þótt maður kunni á einhverjum tíma að sjá eftir því, heldur en að þurfa að sjá eftir því í ellinni að hafa ekki látið slag standa.“

Fjölnir segir að hann hafi sáralítið komið nálægt bílaviðgerðum eða slíku fram til þessa, áhuginn hafi legið í akstrinum sjálfum. „Ég er með ótrúlega gott lið með mér. Það skiptir öllu máli. Þetta eru menn sem ég hef kynnst hér á Akureyri í kringum mótorsportið og bróðir minn og mágur. Fremstur í flokki er Kristján Skjóldal liðstjóri sem hefur stýrt þessu af snilld. Markmiðið var að komast í gegnum mótið, að klára brautirnar tólf, í þessu fyrsta móti og það tókst. Ég gæti ekki verið hamingjusamari.“

Fjölnir á ekki von á að keppa á fleiri mótum í sumar. Hugmyndin var að prófa bílinn og hrista saman liðið en koma svo á næsta ári, grjótharður, og keyra heilt tímabil. Hann er þegar orðinn mjög spenntur. „Þetta er bara brjálæðislegt adrenalínkikk. Þetta er svona eins og að keyra í rússíbana, nema með stýri.“