„Hvað gengur fólki til sem alhæfir svona og dreifir óhróðri um hóp fólks sem það þekkir augljóslega ekki neitt?,“ spyr Anna Lára Steindal, heimspekingur og verkefnisstjóri hjá Rauða Krossinum en hún hefur unnið mikið með samfélagi múslima á Íslandi. Henni kveðst blöskra þegar netverjar á samfélagsmiðlum og í athugasemda kerfum netmiðla réttlæta aðgerðir gegn flóttafólki og kveðst sjálf geta nefnt fjölmörg dæmi sem afsanni þá mýtu að flóttafólk sem komi hingað til lands geri ekkert til að aðlagast samfélaginu.

Anna Lára er verkefnisstjóri í móttöku kvótaflóttamanna hjá Reykjavíkurdeild Rauða krossins og var áður verkefnisstjóri Akranesdeildar Rauða kross Íslands.

„Í kommentakerfum fjölmiðla þennan sunnudaginn hef ég rekist á athugsemdir sem segja að reynslan af múslimum á Akranesi sé svo slæm að hún réttlæti fáránlega tilskipun Trump um að meina múslimum frá sjö ríkjum aðgöngu að Bandaríkjunum. Að allir sem þangað komu lifi á bótum og séu almennt óalandi og óferjandi,“ ritar hún í opinni færslu á facebook sem fengið hefur miklar undirtektir.

„Nú vill svo til að ég þekki þetta fólk og aðstæður þeirra nokkuð vel og veit að þessar alhæfingar standast ekki skoðun. Burtséð frá því að þó svo væri réttlætti það ekki þá skammsýni og heimsku sem Donald Trump gerist sekur um með þessum gjörningi.

Ég er til dæmis ekki viss um að fólkið á Höfða, þar sem ein úr þeim hópi vinnur, tæki undir þetta, enda sólargeisli í lífi margra íbúa á Höfða.

Ég er heldur ekki viss um að kennarar þeirra sem hafa útskrifast úr fjölbraut með glimrandi vitnisburð og ýmist stunda eða stefna á háskólanám myndu gera það.“

Þá nefnir Anna Lára einnig að þjálfarar ungs manns úr hópnum muni líklega ekki taka undir þessar alhæfingar, en sá drengur hefur lagt verulega hart að sér og er að sögn Önnu nú ein nú ein af vonarstjörnum Skagamanna í fótbolta.

„Eða kennarar þeirra sem enn stunda nám – t.d. í FVA og Tækniskólanum. Eða vinnuveitandi eins úr hópnum sem starfar sem túlkur í Reykjavík. Ég gæti haldið svona áfram – en læt það eiga sig,“ ritar Anna Lára jafnframt í pistli sínum um leið og spyr hvað fái einstaklinga til að tjá sig svo hispurslaust um málefni sem sé þeim ekki kunnugt.