Það hefur varla farið fram hjá neinum að skemmtiferðaskipum hefur fjölgað hér við land á undanförnum árum. Árlega koma nú í kringum 200 skemmtiferða skip til landsins.
Þessi skip eru í raun fljótandi hótel með tilheyrandi lúxus. Margir velta því fyrir sér hvernig er um að litast í svítunum á skemmtiferðaskipunum. Hér eru nokkur dæmi um það.
Svissneska skipafélagið Viking siglir meðal annars til Íslands. Um borð í skipinu Viking Saturn er sérlega hugguleg svíta, Owner´s Suite. Hún er 134 fermetrar að stærð með mörgum herbergjum, sérvöldu vínsafni og borðstofu þar sem hægt er að halda matarboð fyrir tólf manns. Svítunni fylgir leigður bíll og bílstjóri í hverri höfn. Þar að auki fylgir saunabað með útsýni yfir sjóinn svítunni.
Vitaskuld kostar skildinginn að gista í svítunni. Um 2,6 milljónir króna fyrir 35 daga dvöl.
Bandaríska skipafélagið Celebrity rekur 3 þúsund farþega skip sem heitir Celebrity Edge og siglir mikið um Karíbahafið. Þar má finna svítu sem kallast Iconic Suite. Svítan er 239 fermetrar að stærð með tveimur svefnherbergjum og tveimur baðherbergjum.
Með útsýni næstum allan hringinn inniheldur svítan meðal annars eigin verönd og heitan pott. Einnig aðgang að sérstöku VIP svæði skipsins þar sem eru flottir veitingastaðir og sólbaðssvæði sem aðrir gestir skemmtiferðaskipsins hafa ekki aðgang að.
Verðmiðinn fyrir 13 daga dvöl er ekkert smáræði, tæpar 4 milljónir króna.
Bíómyndarisinn Disney rekur sitt eigið skemmtiferðaskip, Disney Wish. Þar er að finna svítu sem kallast Tower Suite, efst í skipinu.
Þessi 182 fermetra svíta hefur fjögur svefnherbergi, eigin lyftu og bókasafn. Einnig veitir leiga svítunnar aðgang að sérstöku VIP svæði.
Skipið siglir styttri leiðir, einkum til Bahama eyja, en rukkað er í botn. Verðmiðinn fyrir 3 nætur er 1,9 milljón króna.
Á hinu glænýja skemmtiferðaskipi Ilmu, í eigu skipafélagins Ritz-Carlton Yacht Collection, má finna sérlega glæsilega svítu, einnig titluð Owner´s Suite. Skipið er mun minna en áðurnefnd skip, en það er frekar kallað „ofursnekkja“ í stað skemmtiferðaskips. Tekur skipið aðeins tæplega 500 farþega.
Svítan er ekki mjög stór, aðeins 96 fermetrar, en henni fylgir einkaverönd sem er 67 fermetrar. Ekki nóg með það þá fylgir henni þjónn og mörg önnur þægindi.
Ilma siglir sína fyrstu ferð næstkomandi september, frá Monte Carlo til Rómar. Siglingin stendur yfir í 7 nætur. Verðið fyrir svítuna er 7,7 milljónir króna.
Eina minnstu lúxussvítuna má finna um borð í skemmtiferðaskipinu, eða bátnum, Bon Voyage. En hún kallast Grand Suite.
Svítan er aðeins 26 fermetrar að stærð, dvergvaxin miðað við margar aðrar, en hún er glæsileg engu að síður og einstaklega fallega skreytt.
Gestir fá meðal annars morgunmat sendan á herbergið, bryta og skópússun. Skipið siglir vanalega á milli Frakklands og Norður Afríku
Norwegian Jewel er skemmtiferðaskip sem er oft siglt til Íslands. Þar má finna risavaxin svítu sem kallast The Haven Garden Villa. Telur hún litla 621 fermetra, einkasundlaug, sólpall, heitan pott og bryta.
Þar að auki er gestunum í svítunni boðið í kokteilpartí með skipstjóranum og stýrimönnunum.
Þrátt fyrir stærðina kostar svítan „aðeins“ 6,1 milljón króna í 11 nætur.