Gypsy Rose Blanchard ræddi lýtaaðgerð sem hún gekkst undir á nefi í myndbandi á TikTok í gær. Mikið hefur verið fjallað um Blanchard í fjölmiðlum vestanhafs eftir að hún losnaði úr fangelsi í desember. Þá hafði hún afplánað átta ár af tíu fyrir morðið á móður sinni, Dee Dee Blanchard, 10. júní 2015. Móðirin glímdi við sjúkdóminn Munchausen by proxy og náði að sannfæra dóttur sína, fjölskyldu, nágranna og lækna um að dóttirin væri langveik.

„Ég verð að fara varlega í kringum nefið því eins og allir vita þá fór ég í nefaðgerð. Ég verð að fara varlega því nefið á mér er enn að gróa,“ segir Blanchard sem segir hafa gúgglað hverju mætti búast við í bataferlinu áður en hún lagðist undir hnífinn í apríl. 

„Það sem ég var hissa á að lesa er að það tekur heilt ár að sjá endanlega útkomu. Nefið mun bólgna upp og hjaðna aftur og líta vel út í einn mánuð en svo næsta mánuðinn getur það litið út eins og þú hafir verið barinn í andlitið.Mér fannst ég alltaf vera mjög óörugg með nefið. Mér fannst þetta ekki vera kvenlegt nef. Guð veit að mér var strítt.“

Blanchard var með sárabindi í fimm daga eftir aðgerðina. „Eitt af því sem ég er að fást við er eins og, innri saumarnir sem mig klæjar enn í, og ég skal bara segja þér, horið er klikkað! Ég get ekki einu sinni snýtt mér.“

Blanchard hafði áður litað dökkt hár sitt ljóst og látið lagfæra í sér tennurnar, en segist ekki ætla að fara í fleiri breytingar á útliti sínu.

„Ég hef verið spurð að þessu áður, hvort ég vildi fara í fleiri lýtaaðgerðir, og satt að segja ætla ég ekki að gera það. Ég er mjög ánægð með allt annað. Ég er með mjög kvenmannlegan vöxt. Ég er með línur, ég er með brjóst. Ég er mjög stolt af þeim.“