„Hér með tilkynnist að ég mun ekki hafa nokkra skoðun á Eurovision þetta árið, sama á hverju gengur,“ segir Illugi Jökulsson útvarpsmaður, blaðamaður og rithöfundur. 

„Mér fannst strax að við ættum ekki að vera með ef í því fælist að deila sviði með fánaflippandi Ísraelsríki, og við það stend ég. Hins vegar er þetta allt nú orðið svo skrýtið að ég ræð ekki við þetta, og hef því ákveðið að hafa bara alls öngva skoðun á þessu framar nú í ár. Punkturinn yfir i-ið var þegar sá ágæti tónlistarmaður Bashar, sem flutti gamlan palestínskan söng mjög fallega á Austurvelli í dag, reynist ætla að flytja í keppninni einhvers konar óð til bandarískra kúreka sem rændu heilli heimsálfu frá frumbyggjum Ameríku. Það er of skrýtið fyrir mig, hvað sem leið skýringu hans á þessu í sjónvarpsþættinum í kvöld,“ segir Illugi. Segir hann geta séð um skoðanir á keppninni þetta árið.

Líflegar umræður hafa spunnist við færslu Illuga á Facebook.