Brasilíska fyrirsætan Julia Medeiros, sem er gjarnan sögð vera tvífari Kylie Jenner, gekkst undir aðgerð til að endurheimta slímhimnufellinguna sem hylur op legganganna og er í daglegu tali kallað meyjarhaft.
Aðgerðin kostaði hana tæplega 1,3 milljónir króna en henni hefur nú verið boðnar 273 milljónir fyrir að „missa meydóminn“ á ný.
Julia var mikið í fréttum fyrir ári síðan þegar hún undirgekkst aðgerðina. Hún sagðist hafa gert það til að fá að upplifa það „aftur að missa meydóminn.“ Hún sagðist hafa orðið fyrir vonbrigðum þegar hún stundaði kynlíf í fyrsta skipti þegar hún var sautján ára og vildi fá annað tækifæri með einhverjum sem hún elskar.
Julia nýtur mikilla vinsælda á samfélagsmiðlum og fær ótal skilaboð frá aðdáendum sínum, sem eru langflestir karlkyns.
Hún er vön að fá alls konar fallegar eða skrýtnar kveðjur en ein skilaboð gerðu hana orðlausa.
Karlmaður bauð henni 273 milljónir króna fyrir að koma til hans í Dúbaí og verja helgi með honum.
„Ég er ennþá í áfalli! Ég fæ oft beiðnir frá fólki, sumir tala um blæti sem þeir eru með á meðan aðrir vilja bara spjalla. En þetta var svo há upphæð að ég fékk sjokk,“ sagði hún um málið við NudePR.
Hún deildi skilaboðunum sem hún fékk:
„Ég heiti Ahmed, ég hef séð viðtölin við þig um aðgerðina sem þú gekkst undir. Ég hef verið að fylgja þér á samfélagsmiðlum í einhvern tíma, ég vil bjóða þér að eyða helginni með mér í Dúbaí. Eru 273 milljónir nóg fyrir þig? Vinsamlegast svaraðu skilaboðunum frá mér. Ég hef mikinn áhuga að kynnast þér.“
Maðurinn sendi henni símanúmerið sitt svo þau gætu spjallað betur saman.
Julia sagði þetta ekki vera í fyrsta skipti sem einhver býður henni pening í skiptum fyrir kynferðislega greiða. Hún tók það samt skýrt fram að hún myndi aldrei samþykkja slíkt boð.
„Ég mun bara gera þetta fyrir ást, bara þegar ég finn réttu manneskjuna. Það er ekki til nógu mikill peningur í heiminum til að kaupa meydóminn minn. Ég er mjög rómantísk.“
