Gunnar Ingi kom af stað átakinu Lífið á biðlista í haust, sem er herferð gegn löngum biðlistum í meðferð og afvötnun. Hann er einnig tónlistarmaður og kemur fram undir listamannanafninu Major Pink og gaf nýverið út plötu.
Gunnar hefur verið edrú í næstum tíu mánuði en hans neyslusaga hófst þegar hann var sextán ára gamall og byrjaði að fikta með áfengi í framhaldsskóla, eins og margir unglingar gera.
„Í byrjun, eins og hjá öllum, er þetta í alvörunni bjargráð. Þetta breytti lífi mínu, þetta virkaði fyrir mig í byrjun, eins og hjá öllum. Það er ástæða fyrir því að við höldum áfram að gera þetta. En á einhverjum tímapunkti hættir þetta að virka og þetta verður nauðsyn frekar en eitthvað annað, og þú verður að fá þér næsta skammt. Þá ertu farinn að berjast við fráhvörfin, síðan bætast við ný og sterkari efni,“ segir hann og bætir við að neysla meðal ungmenna sé mun harðari í dag en áður.
„Yngri kynslóðin dag er að byrja mjög hratt í OxyContin neyslu og að reykja krakk, eitthvað sem var ekki til þegar ég var að byrja, eða mjög sjaldgæft. Allir sem ég hef tekið viðtal við og nánast allir sem ég þekki sem eru að koma inn í samtökin núna, eða að fara í meðferð, meirihluti af þeim er að fara eftir harða oxycontin eða krakkneyslu, sem er töluvert harðari neysla en ég þekki sjálfur.“
Brotið hér að ofan er hluti af viðtali við Gunnar Inga, smelltu hér til að horfa á þáttinn í heild sinni.
Horfðu á þættina frá Lífið á biðlista á YouTube, TikTok eða Instagram.
