Eva Berglind Tulinius lést á krabbameinsdeild Landspítalans 13. ágúst 2022. 32 ára að aldri. Eva Berglind skildi eftir sig eiginmann og tvö börn sem í dag eru sjö ára og að verða þriggja ára.
Eva Berglind var þrítug og gengin 17 vikur með sitt annað barn þegar hún var greind með þríneikvætt brjóstakrabbamein. Viku síðar hóf hún kröftuga lyfjameðferð og að henni lokinni fór hún í keisaraskurð og brjóstnám í sömu aðgerð.
Eva Berglind var í viðtali í blaði Ljóssins árið 2021, þá krabbameinslaus og hlakkaði til að fara út í lífið aftur, meðal annars í vinnu sína sem ljósmóðir á á meðgöngu- og sængurlegudeild Landspítalans. Meinið tók sig þó upp aftur og sigraði að lokum.
Vinkonur og samstarfskonur Evu Berglindar hafa nú hafið söfnun í samvinnu við Líf styrktarfélag þar sem safnað er fyrir stofu á meðgöngu- og sængurlegudeildinni á Landspítalanum sem verður merkt Evustofa. Stefnan er að opna stofuna á afmælisdegi Evu 9. febrúar 2024 en þá hefði hún orðið 34 ára.
Í færslu sem deilt er á samfélagsmiðlum segir um söfnunina:
„Eftir ótímabært fráfall elskulegu vinkonu okkar og samstarfskonu Evu Berglindar, langaði okkur að finna leið til að halda minningu hennar á lofti og á sama tíma styrkja gott málefni. Eva var ljósmóðir, af lífi og sál. Hún elskaði að vera ljósmóðir og var stolt af því að bera þann titil. Í samvinnu við Líf styrktarfélag og með leyfi frá aðstandendum hennar ákváðum við að hefja söfnun til styrktar Líf í nafni Evu.Fyrir söfnunarféið verður útbúin stofa á Meðgöngu- og sængurlegudeildinni á Landspítalanum (vinnustað Evu) sem verður merkt Evustofa, máluð í “Evulit” og hlutir sem minna á Evu okkar munu prýða stofuna. Einnig verður keypt göngugrind sem notuð verður fyrir konur sem þurfa á því að halda í legu sinni á deildinni. Stefnan er að opna stofuna á afmælisdegi Evu þann 9.febrúar 2024 en þá hefði hún orðið 34 ára.
Ef þið viljið taka þátt í söfnununni eru frjáls framlög lögð inn á reikning Líf styrktarfélags: Reikningsnúmer: 515-14-411000 og kennitala: 501209-1040. MIKILVÆGT er að setja nafn Evu í skýringu þegar lagt er inn svo söfnunarféð fari á réttan stað!“
Þeir sem vilja styrkja ofangreinda söfnun geta lagt inn á neðangreindan reikning. Munum að margt smátt gerir eitt stórt.
Reikningsnúmer: 515-14-411000
Kennitala: 501209-1040
Skýring: Eva söfnunarféð fari á réttan stað
