Birta hefur áður verið heimilislaus og hana dreymir um stöðugleika og öruggt húsnæði.
„Ég hef verið heimilislaus þrisvar og ég sem betur fer hef mjög góða vini í dag sem vilja hjálpa tímabundið,“ segir hún í samtali við DV.
„En mér finnst rosalega óþægilegt að búa inni á vinum mínum með eina sex ára. Ég er mjög sjálfstæð manneskja og vill finna öruggt heimili fyrir okkur. Ég meika ekki svona mikinn flutning eins og ég hef gert í gegnum árin og ætlaði ég að halda okkur í núverandi húsnæði í miklu lengri tíma en vegna ástandsins á leigumarkaðinum í dag þá var byrjað á að hækka leiguna töluvert og nú þarf að selja húsnæðið sem við erum að leiga.“
Birta er opin fyrir hverju sem er á meðan það er á höfuðborgarsvæðinu.
„Greiðslugeta er 200 þúsund á mánuði. Við erum til í að vera hvar sem er á höfuðborgarsvæðinu. Okkur er sama hversu lítið húsnæðið er. Ég er með góð meðmæli, skila greiðslum alltaf á réttum tíma, ekkert partý vesen,“ segir hún og bætir við að hún sé að leita að lítilli íbúð svo hún geti safnað og flutt erlendis.
Leitin gengur mjög illa þrátt fyrir ötula leit síðastliðna fjóra mánuði. „Ég hef daglega sent skilaboð á leigusala með húsnæði til leigu en annaðhvort fæ ég ekki svar eða okkur er neitað,“ segir hún.
„Ekki nóg með það að þá hefur allt hækkað í fáránlegar upphæðir. Ég er að sjá stúdíó íbúðir á 220 þúsund á mánuði sem er brenglun. Ég er í þriggja herbergja íbúð sem var upphaflega 230 þúsund og ég sé svipaðar íbúðir núna á 250 til 300 þúsund, ef ekki hærra.“
Leigusalar og aðrir sem vita af íbúð fyrir mæðgurnar geta sent skilaboð á Birtu á Facebook.