Glöggir netverjar muna eftir konunni sem var kölluð „uppvakningur Angelinu Jolie.“ Hún heitir réttu nafni Fatemeh Kishwand en gengst undir Sahar Tabar.

Sahar vakti heimsathygli fyrir nokkrum árum fyrir að nota farða og myndvinnsluforrit til að breyta andliti sínu fyrir samfélagsmiðla. Fylgjendahópur hennar stækkaði ört og héldu margir þetta ógnvekjandi andlit vera hennar eigið.

Hún var handtekin í Íran í október árið 2019 fyrir hegðun sína á Instagram og var í kjölfarið dæmd til tíu ára fangelsisvistar fyrir að „spilla ungu fólki, hvetja til ofbeldis og guðlast.“

Sahar, sem er 21 árs í dag, losnaði fyrir stuttu úr fangelsi og kom fram í viðtali til að ræða um útlit sitt á samfélagsmiðlum. Þetta var í fyrsta skipti sem hún sýndi sitt rétta andlit opinberlega.

Hún viðurkenndi að hún hefur aldrei gengist undir fegrunaraðgerð og myndunum hafi verið breytt með myndvinnsluforriti.

Samfélagsmiðlastjarnan var í viðtali hjá ríkisrekinni sjónvarpsstöð og sagði að hún hafi viljað „vera fræg síðan ég var barn.“

„Það er auðvelt á netinu, miklu auðveldara en að verða leikkona,“ sagði hún.

Hún sagði einnig að hún muni að öllum líkindum ekki fá sér Instagram forritið í síma sinn og alls ekki stofna nýja síðu.