„Síðasta utanlandsferð mín fyrir Covid var til Maldíveyja. Ég tók með mér bakpoka, flaug fyrst frá Íslandi til London, þaðan til Abu Dabí, þaðan til Malé og loks sigldi ég á ferju í klukkutíma að eyju þar sem ég gisti á AirBnB. Ég hafði ekki efni á lúxushóteli en flestir ferðamenn fara á tilbúnar eyjar sem byggðar eru sem einn hótelklasi frá grunni. Þar gilda allt önnur lög en á eyjum innfæddra en á lúxushótelunum eru barir, diskótek, spa og fleira en þar sem innfæddir á Maldíveyjum eru múslimar þá eru þær eyjar þar sem þeir búa með engum börum, engu diskóteki, ekki hægt að nálgast nudd og áfengi stranglega bannað,“ segir hún.
„Það var skyndiákvörðun hjá mér að fara og ég sagði við vini mína að ég væri að fara þessa ferð til að fanga liti en í huga mér sá ég mynd af konu í rauðum kjól liggjandi á hvítu sandrifi sem hverfur í takt við ölduganginn þegar flæðir að. Smátt og smátt hverfur landið undir henni og sjórinn tekur við. Hún syngur um takt náttúrunnar, takt hjartsláttarins og takt síns eigin lífs og lagsins,“ segir hún.
Bergljót varð að láta þetta verða að raunveruleika. „Þessi mynd lét ekki listamanninn inn í mér í friði og fannst mér ég verða að framkvæma þetta en það var ekki einfalt. Fyrst þurfti ég að taka þessar þrjár flugvélar, svo ferjuna og loks finna rifið hvíta og rétta tökuliðið sem gæti framkvæmt þetta. Um tíma virtist þetta útilokað en loks var lagt af stað í leiðangur að rifi sem var eitt og yfirgefið langt frá öllu öðru. Þar var ég skilin eftir snemma morguns og ekki sótt síðan fyrr en farið var að flæða að og miðbaugssólin komin í hæsta punkt. Hún var svo sterk að húðin mín virtist í fyrstu svartbrunnin eftir átökin. Samt hafði ég borið vel á mig sólarvörn áður en ég fór en sólarvörnin var auðvitað löngu horfin og andlit mitt alveg skrælt því sólin tvöfaldaðist við endurkastinu frá sjónum.“
Hún segist hafa orðið ástfangin á ferðalaginu. „Það varð úr að þessi kona í rauða kjólnum á hvíta sandrifinu með sjóinn allt í kring varð þemað í myndbandinu við lagið mitt Crazy Full of Love sem ég er að senda frá mér í dag. Litirnir á svæðinu eru einstakir en sjórinn er túrkisgrænn þar sem kórallinn er og alveg upp við rifið en dimmblár þar fyrir utan. Ég varð ástfangin af þessum litum og hinu ótrúlega frelsi sem maður upplifir við að horfa þessa fallegu liti sjávarins hvert sem augað eygði og allt svo flatt. Hæsti toppur á Maldíveyjum er um tveir metrar yfir sjávarmáli. Allt er flatt, engin fjöll, engin húsdýr, engin ræktun bara sjórinn, sandurinn og sólin hvert sem augað eygir. Það er mögnuð frelsistilfinning sem fylgir því að ferðast þarna um á bát og þessir einstöku litir heilluðu mig djúpt.“
Myndbandið kom út fyrr í dag. „Ég vona að mér hafi tekist að fanga aðeins þessa auðn sem býr í sandinum, sólinni og sjónum, þessa miklu vídd og sterku liti.“
Horfðu á það hér að neðan.
