Kanye West, sem kallar sig Ye, sætir nú harðri gagnrýni fyrir nýtt tónlistarmyndband. Í því rænir hann Pete Davidson, eða leirútgáfu af grínistanum, og grefur hann lifandi.
Mörgum þykir Kanye hafa farið yfir strikið með þessu nýjasta útspili en þetta er ekki í fyrsta sinn sem rapparinn tekur Pete fyrir.
Sjá einnig: Stormasöm helgi hjá Kanye West – Kallaði Pete Davidson fávita og birti persónuleg skilaboð frá honum
Pete er í sambandi með fyrrverandi eiginkonu rapparans, raunveruleikastjörnunni Kim Kardashian. Kanye hefur ekki farið leynt með óánægju sína á sambandinu, hann kallar Pete: „Skete“, og hefur birt ótal færslur á samfélagsmiðlum um grínistann. Hegðun hans hefur verið furðuleg og á tímum ógnvekjandi í garð Kim og Pete. Kanye virðist líta á Pete sem fyrirstöðu fyrir því að hann taki aftur upp þráðinn með móður barna sinna.
Kanye gaf út tónlistarmyndband við lagið Eazy fyrr í dag og er vísunin í Pete greinileg. Hann meira að segja gróðursetur rósir við höfuð Pete og tínir þær svo upp til að setja í bíl, en margir telja hann vera að vísa í blómasendingu rapparans til Kim á Valentínusardaginn.
Ef einhver er í vafa um að leirkarlinn í myndbandinu eigi að vera Pete þá birti Kanye myndbandið á Instagram og það endar á: „Allir lifðu hamingjusamir til æviloka, nema Skete“ en það er búið að krassa yfir Skete og fyrir neðan stendur: „Þið vitið hver.“
Horfðu á myndbandið hér að neðan.