Fjöllistamaðurinn Jón Gnarr stakk upp á því á Twitter í vikunni að gera nýja Vaktaseríu, sem myndi sækja innblástur í kosningaklúðrið í Alþingiskosningunum sem fóru fram síðustu helgi. Jón kallar þessa hugmynd Kosningavaktina, en þar myndu hinir ástsælu Georg Bjarnfreðarson, og Ólafur Ragnar Hannesson koma fyrir.

„Kominn með fullt af góðum hugmyndum fyrir Kosningavaktina, þar sem Georg Bjarnfreðarson „leiðréttir“ kjörseðla, reynir að kjafta sig útúr því, þegar upp kemst, en nær að klína því á Ólaf, sem að lokum biður þjóðina afsökunar.“ skrifaði Jón á Twitter við miklar undirtektir, en færsla hans fékk hátt í 1500 læk sem er sjaldséð á fuglaforritinu, auk þess sem múgur manns hvatti hann til þess að láta þessa hugmynd verða að veruleika í athugasemdum.

Jón hætti þó ekki þar, heldur birti hann í dag myndband af sér og Pétri Jóhanni Sigfússyni grínista í hlutverkum þeirra Georgs og Ólafs. Þar má heyra Georg spyrja Ólaf: „Er bannað að gera mistök?“ og vitnar þar með í orð Inga Tryggvasonar, formanns yfirkjörstjórnar Norðvesturkjördæmi. 

allt að gerast! #kosningavaktin pic.twitter.com/vnNnSGLV5j

— Jon Gnarr (@Jon_Gnarr) October 1, 2021

Líklega gerir þetta myndband landan gífurlega spenntan, og velta sumir því hreinlega fyrir sér hvort ný Vaktasería sé á leiðinni. Líkt og flestir vita voru sjónvarpsseríunnar Næturvaktin, Dagvaktin og Fangavaktin mjög vinsælar hér á landi. Þeim fylgdi svo kvikmyndin Bjarnfreðarson, sem flestir héldu að væri lokakaflinn í sögu Georgs, Ólafs og Daníels, en hver veit?