Að vinna að heiman hefur allt aðra merkingu fyrir foreldrana Jess Miller, 32 ára, og Mike Miller, 33 ára. Þau sögðu upp „venjulegu“ störfum sínum til að framleiða klám og þéna um rúmlega fimm milljónir á mánuði.

Áður störfuðu þau sem förðunarfræðingur og við viðburðarstjórnun og þénuðu þá um 350 þúsund krónur á mánuði. En tekjurnar hafa margfaldast eftir að þau skiptu um starfsgrein og byrjuðu að taka upp svefnherbergisathæfi sín og selja á netinu.

Parið er með síðu á OnlyFans, PornHub og þau framleiða einnig klám í beinni á síðunni Chasturbate.

„Við slógum strax í gegn sem var frekar spennandi,“ segir Jess í viðtali við Fabulous Digital.

Ári eftir að þau byrjuðu að selja erótískt myndefni höfðu þau þénað nóg og eignast nógu stóran aðdáendahóp til að einbeita sér að kláminu alfarið. Þau hafa þénað yfir 87 milljónir króna undanfarin tvö og hálft ár.

Börnin vita sannleikann

Til að byrja með héldu þau nýja starfi sínu leyndu frá börnum Jess. Jess á tvö börn úr fyrra sambandi, dreng sem er sjö ára og stúlku sem er ellefu ára.

„Við höfum aldrei verið foreldrarnir sem felum eitthvað fyrir börnunum okkar,“ segir Jess og bætir við að þau hefðu ákveðið að byrja að gefa börnunum vísbendingar um starf þeirra í fyrra.

„Við grínuðumst fyrst með það. Við sögðum eitthvað eins og: „Mamma er ber að ofan fyrir framan myndavélina.““

Þau sögðu þeim að lokum allan sannleikann í fyrra. „Drengurinn er of ungur til að skilja almennilega hvað við gerum en þessi eldri var mjög þroskuð varðandi þetta og sagði að á meðan við séum hamingjusöm og elskum þau þá er þetta ekki vandamál,“ segir Mike.

„Að sjálfsögðu töluðum við um framtíðina og hvernig þetta verður. Við höfum alveg hugsað út í kostina og gallana. Sumir hafa brugðist mjög illa við þessu en þetta virkar fyrir okkur og flestum fjölskyldumeðlimum okkar er saman.“

Allir í skólanum komust að þessu

Parið byrjaði að gera myndbönd á TikTok þar sem þau auglýstu erótíska myndefnið sitt. En fljótlega sáu nemendur í skóla barnanna þeirra myndböndin.

„Við sögðum ekki dóttur okkar almennilega frá þessu fyrr en einhver í skólanum hennar sá TikTok-myndböndin okkar og fattaði að við værum klámstjörnur,“ segir Jess.

Þau viðurkenna að viðbrögð margra foreldra í skólanum hafa verið neikvæð. Jess rifjar upp daginn eftir að allir foreldrar skólans komust að sannleikanum. „Hinir foreldrarnir störðu á okkur en við bárum höfuðið hátt,“ segir hún.

Þú getur lesið viðtalið í heild sinni á vef Fabulous Digital.