Leikkonan Kristín Lea Sigríðardóttir er eini starfandi nándarþjálfinn hér á landi. Ita O’Brien er forsprakki nándarþálfunarinnar en Kristín fór á námskeið há henni um þjálfunina. Kristín ræddi um starfið í Lestinni á Rás 1.

Þar segir Kristín að nándarþjálfunin hafi sprottið af #MeToo byltingunni. „Það er Harvey Weinstein sem kemur þeim bolta af stað eins og flestir þekkja. Þá er kallað eftir breytingum og sérstaklega þar sem að þetta sprettur út úr kvikmyndabransanum þá þurfti að gera eitthvað þar,“ segir hún. „Allir sem ég hitti í vinnunni veltu fyrir sér af hverju þetta hefði ekki komið fyrr. En sem betur fer er þetta komið núna.“

Kristín segir að það sé mikill vilji innan kvikmyndagerðarstéttarinnar til að bæta vinnuumhverfið þegar kemur að mörkum leikara en nándarþjálfunin hjálpar til við það. „Þetta er ekki bara gott fyrir leikara, heldur fyrir framleiðsluna og leikstjóra líka. Það vill enginn lenda í óþægilegri stöðu. Það er heldur enginn að reyna það en það getur allt gerst ef það er ekki hugsað út í þessa hluti,“ segir hún.

Sérkunnátta Kristínar kom að góðum notum við gerð kvikmyndarinnar Berdreymi. „Það var sem sagt erfið sena þar sem það var ekki samþykki fyrir kynlífi í atriðinu. [Drengirnir] voru undir lögaldri þannig að þetta var mjög vandmeðfarið,“ segir hún.

Nándarþjálfunin fyrir senur eins og þessa fer þannig fram að það er byrjað að fara yfir senunaog öll mörk, samþykki og hvaðmá snerta. „Við erum ekkert að nota feluorð, við þurfum að tala eins og hlutirnir eru. Eftir það förum við í „róbótaæfingu“, þar sem við göngum í gegnum senuna, þegar við til dæmis snertum öxlina á hinum eigum við að segja hvað við finnum,“ segir hún.

„Við gerum þessar hreyfingar aftur og tölum út frá karakternum og hvernig honum líður. Á þessum tímapunkti erum við aldrei að sýna tilfinningar eða leika, þetta er allt vélrænt. Það er engin snerting sem er ekki leyfileg og enginn eiginleg nánd þannig séð. Síðan gerum við þetta einu sinni eða tvisvar, eftir aðstæðum, og förum í tökur ef allt gengur vel.“

Samkvæmt Kristínu er þetta nándarþjálfunin eitthvað sem á eftir að festa sig í sessi í kvikmyndagerðarbransanum. „Þetta eru ekki bara kynlífssenur, heldur líka ef það er einhvers konar nekt og berskjöldun. Þetta er komið til að vera og það er gríðarleg eftirspurn, ég finn það. Vonandi fara fleiri út í þetta. Þetta er að mótast hérna á Íslandi, það þarf að sjá hvernig þetta fer.“