Eiður Arnarsson, bassaleikari í Stjórninni og Todmobile, keyrði 450 kílómetra án þess að stoppa árið 1990. Ástæðan fyrir bílferðinni var að hann langaði að sjá tónleika með tónlistarstjörnunni Prince. Hann var staddur ásamt Írisi Bjargmundsdóttur, konunni sinni, í Austurríki en þau fréttu að Prince væri með tónleika í Sviss. Þau brunuðu því af stað til að sjá Prince syngja en þau hjónin eru miklir aðdáendur hans.

„Við vorum mætt á svæðið um hálf fimm en vorum ekki með neinn pening á okkur, bara kort, sem hafði ekki verið neitt vandamál í allri ferðinni, við borguðum bara með því,“ segir Eiður í viðtali í útvarpsþættinum Lagalistanum á Rás 2. Eiður og Íris gátu ekki borgað með korti og þurftu því að leita að hraðbanka en fundu engan sem þau gátu notað. „Við fórum á tónleikastaðinn og reyndum að kaupa miða á kortið, við vorum orðin vondauf, og það var ekki hægt.“

Hjónin náðu ekki að fara á tónleikana og fóru því á hótelið sittt. Daginn eftir sáu þau starfslið Prince í morgunmatnum á hótelinu en stjarnan var ekki á staðnum. „Þetta var bara til að strá salti í sárin. Við drifum okkur út í bíl og keyrðum til Austurríkis.“

Prince lést árið 2016 og þá áttaði Eiður sig á því að hann myndi aldrei fá að sjá hann á tónleikum. Í kjölfarið tók hann ákvörðun sem margir gætu grætt á að taka líka. „Þá ákvað ég að hætta að fresta og síðan hef ég drifið mig að sjá margt sem ég er með á lista.“