Magnús Sigurbjörnsson, fyrrverandi framkvæmdastjóri borgarstjórnarhóps Sjálfstæðisflokksins, ákvað í dag að koma með lausn á vandamáli sem flestir hafa glímt við á ævinni.
„Ég ætla að búa til nýja reglu í lífinu,“ sagði Magnús í færslu á Facebook-síðu sinni. „Við þekkjum öll farsímann og tölum í hann oftar en einu sinni á dag. Við virðumst þó vera að lenda í því stundum að í miðju símali slitnar samtalið og þá kemur að því að hringja til baka.“
Eflaust kannast allir við þetta vandamál sem Magnús talar um. „Oftar en ekki reyna báðir aðilar að hringja í hvorn annan sem endar með því að þeir fá á sama tíma taltóninn fræga hjá hvorum öðrum. Eftir þetta ferli halda báðir aðilar áfram að hringja í hvorn annan eða báðir aðilar bíða því þeir halda að hinn aðilinn sé að fara að hringja og tíminn sem fer í það að ná aftur sambandi við hinn aðilann fer að taka forever. “
Magnús er þó með lausn á vandamálinu. „Þess vegna vil ég binda enda á þessa óvissu sem fer í gang þegar símtöl slitna. Reglan er einföld, sá hinn sami sem hringdi til að byrja með á að sjá um að hringja aftur, sama hvað.“
