„Ég ólst upp hjá afa mínum og ömmu, Lárusi Fjeldsted og Lovísu Fjeldsted, þar til þau létust sama daginn með nokkurra klukkustunda millibili þegar ég var 15 ára. Þau bjuggu lengi vel í Tjarnargötu 33, húsi sem Hannes Hafstein byggði og er nú leikskólinn Tjarnarborg,“ segir Tómas Andrés Tómasson, betur þekktur sem Tommi á Hamborgarabúllunni í samtali við Morgunblaðið. Tommi er sjötugur í dag, en hann fæddist þann 4. apríl árið 1949 í Reykjavík.
Í greininni er farið yfir lífshlaup Tomma, en hann lærði matreiðslu á Loftleiðum og lauk þar námi árið 1971. Hann útskrifaðist með verslunarpróf frá Verzlunarskóla Íslandi ári síðar, en fyrsta reynslan af rekstri kom í október árið 1973 þegar að Tommi keypti Matarbúðina. Hana rak hann í hálft ár. Seint á áttunda áratug síðustu aldar flutti Tommi til Miami í Flórída í Bandaríkjunum með fjölskyldunni. Hann útskrifaðist með BA-gráðu í veitingastjórnun frá Florida International-háskólanum í júní árið 1979.
„Ég skildi í framhaldinu, en ég drakk of mikið. Ég fór í meðferð í júní 1980 og hef því verið edrú í næstum 39 ár,“ segir Tommi, en hann er þríkvæntur. Fyrrverandi eiginkonur hans eru Jóna Guðlaug Ingvadóttir, fædd 27. maí 1950, Helga Bjarnadóttir, fædd 7. desember 1959, og Laufey Jóhannesdóttir, fædd 1. janúar 1966. Tommi á synina Ingva Tý, fæddur 1968 og Tómas Áka, fæddur 1974, með Jónu, dótturina Melkorku Katrínu, fædd 1995, með fyrrverandi sambýliskonu sinni Ingibjörgu Pálmadóttur og dótturina Úlfhildi með Laufeyju.
Síðan lá leiðin heim til Íslands og Tommi hjálpaði vini sínum að opna hamborgarastaðinn Winni’s árið 1980. Nokkrum mánuðum síðar, í mars árið 1981, opnaði Tommi Tommaborgara.
„Ég rak staðinn í þrjú ár og seldi yfir milljón hamborgara. Ég seldi staðinn og flutti til Kaliforníu og æfði í Gold’s Gym til að fá nýjar hugmyndir. Ég hitti Isaac B. Tigrett, stofnanda Hard Rock Cafe, í New York á þessum tíma og skrifaði undir samning í september 1984 um að opna Hard Rock Cafe á Íslandi.“
Hard Rock Cafe átti að vera í Kringlunni, sem á þessum tíma var ekki tilbúin. Á meðan Tommi beið eftir að verslunarmiðstöðin kláraðist opnaði hann skyndibitastaðinn Sprengisand árið 1985. Það gekk ekki sem skildi.
„Ég varð næstum gjaldþrota á því og ég og þáverandi eiginkona mín, Helga Bjarnadóttir, bjuggum á skrifstofunni í þrettán mánuði og unnum allan sólarhringinn við að koma Hard Rock Cafe á laggirnar. Það tókst en Helga hafði líka opnað með mér Tommaborgara og var í raun lykillinn að velgengni þessara tveggja staða.“
Tommi opnaði Glaumbar og Ömmu Lú árið 1990. Árið 1992 keypti hann Hótel Borg. Eftir mörg ár í rekstri ætlaði hann að setjast í helgan stein árið 2003, „en uppgötvaði að ég væri nærri eignalaus eftir allan þennan tíma svo ég ákvað að opna aftur hamborgarastað og kallaði hann Hamborgarabúllu Tómasar.“
Fyrsta Hamborgarabúlla Tómasar opnaði árið 2004 og nú eru staðirnir sjö á Íslandi og ellefu í Evrópu. Athygli hefur vakið í hve góðu formi Tommi er, en hann segist lyfta hundrað kílóum í bekkpressu á góðum degi.
„Svo eyði ég miklum tíma í að leysa sudoku- þrautir, það skerpir hugann. Ég er líka alltaf með augun opin ef mér skyldi detta eitthvað spennandi í hug.“
