Í nýjasta þætti Poppsálarinnar er fjallað um óendurgoldna ást og af hverju ástarsorg getur verið svona sársaukafull.
Poppsálin er poppmenningarlegt hlaðvarp með sálfræðilegu ívafi. Fjallað er um ýmis sálfræðileg málefni sem tengjast poppmenningu sem og áhugaverðar rannsóknir og pælingar innan sálfræðinnar.
Elva Björk Ágústsdóttir sálfræðikennari og Sólrún Ósk Lárusdóttir sálfræðingar hafa lengi haft áhuga á ástinni og skoðað ástina, hrifningu og ástarsorg frá vísindalegu sjónarhorni. Í þættinum velta þær fyrir sér spurningum á borð við:
Af hverju verðum við hálf klikkuð þegar við upplifum ástarsorg?
Af hverju ástarsorgin sé svona sár?
Hvað einkennir óendurgoldna ást?
Er óendurgoldin ást ást eða eitthvað annað?
Hvað gerist þegar við upplifum ástarsorg?
Í þættinum fjalla þær um það hásæti sem við setjum oft manneskjuna í sem við elskum en elskar okkur ekki til baka. En óendurgoldin ást er oft talin vera sterkasta og heitasta ástin sem við getum upplifað.
Elva og Sólrún setja þó spurningamerki við það hvort óendurgoldin ást og sá sársauki og sú höfnun sem fylgir þeirri tilfinningu geti flokkast sem ást. Þú sérð manneskjuna sem þú elskar í hillingum. Þú ert komin með ímyndaða útgáfu af manneskjunni og ímyndaða útgáfu af lífinu ykkar saman.
Þetta er draumasýn en ekki raunveruleikinn. Það getur verið gríðarlega erfitt fyrir aðra, sem við eigum svo seinna í heilbrigðu og gagnkvæmu ástarsambandi við að toppa þessa draumaútgáfu sem þú hefur af „sambandinu“ sem einkennir óendurgoldna ást.
Í þættinum ræða Elva og Sólrún einnig um ástin sem einhvers konar fíkn og fara yfir þá líffræðilegu þætti sem tengja saman fíkn, fráhvörf og ástarsorg. Þegar slitnar upp úr ástarsambandi fara ýmis líffræðileg ferli af stað í líkama okkar og heila.
Rannsóknir benda til þess að ástarsorg sé ekkert ólík líkamlegum sársauka. Flæði og magn ýmissa gleði og vellíðunar boðefna minnkar sem getur valdið svipaðri líðan og einstaklingar í fráhvörfum frá vímuefnum upplifa.
Að lokum segir Sólrún frá sérkennilegu fyrirbæri sem nefnist Erotomania. Um er að ræða sálfræðilegt fyrirbæri sem þar einstaklingur er haldinn þeim ranghugmyndum að annar aðili, oft einhver frægur eða þekktur sé ástfanginn af honum.
Dæmi um þetta er Richard Lopez sem hafði þráhyggju fyrir Björk Guðmundsdóttur söngkonu. Hann trúði því að söngkonan væri ástfangin af honum og að lög og textar hennar væru leynileg skilaboð til hans. Hann gerði hvað sem hann gat til að nálgast Björk og tók sitt eigið lífið árið 1996 eftir að hafa sent sprengju heim til Bjarkar með það að markmiði að drepa hana.
Poppsálin hefur fjallað um mál Richard Lopez og hægt er að nálgast þann þátt á öllum helstu hlaðvarpsveitum.
Hægt er að hlusta á þáttinn um ást og ástarsorg hér: