Orðið á götunni er að Steingrímur J. Sigfússon, forseti Alþingis, sé nú í óða önn að semja yfirlýsingu þar sem fram komi áríðandi upplýsingar um Piu Kjærsgaard, forseta danska þingsins.
Piu þarf vart að kynna fyrir landanum eftir hinn margfræga Þingvallafund, en málið hefur undið upp á sig svo um munar og nú er skollið á með ritstríði milli Piu og Guðmundar Andra Thorssonar, þingmanns Samfylkingarinnar. Guðmundur birti grein á vef danska tímaritsins Information, hvar hann segir Piu hafa komið fram við Íslendinga líkt og Stórdani, þar sem hún veitti þingmönnum tilsögn í kurteisi eftir uppákomur þingfundarins á Þingvöllum, hvar veru hennar var mótmælt.
Pia svaraði grein Guðmundar og sakar hann um að ala á sundrungu og segist á engan hátt tengja við að vera Stórdani, enda ekki fædd þegar Danir stjórnuðu Íslendingum.
Orðið á götunni er að í yfirlýsingu Steingríms sé að finna útskýringu á því, hvort þessi orð Piu séu skrifuð af persónunni Piu, eða Piu Kjærsgaard, forseta danska þingsins, þar sem ekki liggi alltaf ljóst fyrir í hvoru hlutverkinu hún sé hverju sinni.
