Harpa er komin í fullan gang þrátt fyrir að hafa farið dálítið hægt af stað eftir miklar lokanir og takmarkanir á tímum heimsfaraldurs. Ekkert jafnast á við að hlýða á lifandi viðburð með öðru fólki á dásamlegum sal með frábærum hljómburði. Víkingur Heiðar og Laufey Lín slógu í gegn með þrennum uppseldum tónleikum hvort núna á þessu ári. Umboðsmaður Laufeyjar Línar sagði Svanhildi Konráðsdóttur, forstjóra Hörpu, að Harpa væri besta húsið sem þau hefðu komið í á heimstónleikaferð Laufeyjar Línar. Svanhildur er gestur Ólafs Arnarsonar í Markaðnum á Eyjunni.
Markadurinn - Svanhildur Konradsdottir - 1.mp4
„Það tók dálítinn tíma eftir heimsfaraldurinn að vinna aftur upp þessa tiltrú og áhuga og skuldbindingu fólks til að kaupa miða og koma á tónleika. Fólk var kannski að bíða alveg fram á síðustu stund af því að fólk var búið að bíða í tvö til þrjú ár í því ástandi að geta ekki alveg treyst hvort …“
Já, einhverjir áttu miða rétt fyrir Covid og viðburðurinn hafði ekki enn átt sér stað þremur árum síðar …
„Nákvæmlega. Einmitt, og fólk átti uppsafnað kannski einhverja átta tónleika eða eitthvað svoleiðis. Það tók svolítinn tíma að ná aftur svona betra jafnvægi. Það er að nást, sem er mjög gleðilegt. Svo erum við að sjá svona fallegar og skærar stjörnur eins og Víking Heiðar með þrennu í febrúar, afmælistónleikana, þar sem ég held að fólk hafa bara fallið í trans, eiginlega, við að hlusta á þetta.“
Það var sko upplifun, það get ég vottað sjálfur.
„Einmitt, þetta var nánast trúarleg upplifun, og það er auðvitað galdurinn í þessum lifandi viðburðum. Þú getur auðvitað hlustað á dásamlega tónlist í Spotify, eða hvaða veitu sem er, eða gömlu plötuna þína, en það að upplifa þessa samveru og þessar tilfinningar sem verða í sal, þegar fólk hlustar saman, það er eitthvað sem er óviðjafnanlegt.“
Og líka í þessum sal, hljómburðurinn!
„Eldborgarsalurinn er í raun og veru eins og nokkurs konar hljóðfæri í sjálfu sér, vegna þess að það er hægt að stilla hann af á ótal vegu til að hámarka, eða fá góðan hljómburð, allt frá því að vera með einsöngvara eða einleikara yfir í að vera með dauðarokk. Það er allt þar á milli – sinfóníuhljómsveitir – þannig að salurinn er yndislegur,“ segir Svanhildur.
„Ekki má heldur gleyma hinni, já, þær eru raunar margar stjörnurnar, en hún Laufey Lín var líka með sína uppseldu þrennu. Það var alveg stórkostlegt að upplifa það og ég var að spjalla bæði við hana og umboðsmanninn hennar, eftir lokatónleikana, og mér þótti vænt um að heyra það að hún er auðvitað búin að vera, sömuleiðis, að túra, halda tónleika víða um heim, og hann sagði við mig, umboðsmaðurinn hennar, hann sagði: Ég veit að þetta hljómar svona eins og skjall, en ég segi þér það alveg satt að þetta er besta hús sem við höfum spilað í og hér hefur okkur liðið best.“
Svanhildur ræðir við Ólaf um tónleika- og ráðstefnuhúsið Hörpu, reksturinn, eigendurna, tækifærin og hver áhrif Hörpu eru á hagkerfið. Innan Hörpu er raunar hagkerfi, ekki svo lítið, sem hefur áhrif á allt íslenska hagkerfið, auk þess að styðja við ferðaþjónustu á ýmsan hátt – jafnvel á þann veg að kemur á óvart.
Hægt er að nálgast þáttinn í heild hér á Eyjunni í fyrramálið, laugardaginn 6. apríl, kl. 8.
