Ríkisstjórnin hefur róið að því öllum árum, jafnvel í gegnum Covid, að koma hér á gjafakvótakerfi fyrir orkuna, vatnið og hafnæði Íslendinga. Steinunn Ólína Þorsteinsdóttir segir ríkisstjórnina vera eins og allslausan mann sem flytur inn á unga og fallega konu og byrjar að láta greipar sópa um eigur hennar. Steinunn Ólína er gestur Ólafs Arnarsonar í sjónvarpsþætti á Eyjunni í aðdraganda forsetakosninga. Hægt er að horfa á þáttinn hér á Eyjunni og á hringbraut.is, sem og á Hringbrautarrás Sjónvarps Símans. Einnig er hægt að hlusta á hann sem hlaðvarp.

Hér má sjá brot úr þættinum:

Eyjan - Steinunn Ólína - 2.mp4

„Ríkisstjórnin hefur hagað sér pínulítið eins og plastpokamaður sem flytur inn á fallega, glæsilega konu, sem er Ísland, og byrjar á því að segja við hana, já, þetta er nú fínt hérna hjá þér og huggulegt, og áður en hún getur snúið sér við þá er hann búinn að selja sjónvarpið, ísskápinn, uppþvottavélina, þvottavélina,“ segir Steinunn Ólína.

Hér má sjá þáttinn í heild:

Steinunn Ólína Þorsteinsdóttir

„Næsta hugmynd sem hann kemur með er að, nú skaltu bara malbika yfir garðinn þinn og breyta honum í bílastæði og seldu svo bara bílastæðið. Svo lætur hann hana selja vini sínum bílastæðið. Svo stingur hann upp á því við hana að hún fari að stunda mengandi iðnað í geymslunni, í svefnherberginu, og svo á endanum stingur hann upp á því við hana, heyrðu mig, vinur minn, hann getur nú keypt af þér þessa íbúð á góðu verði, seldu vini mínum hana. Þá er hún komin með þessa litlu peninga sem hún fær fyrir íbúðina sína og hvað? Lánaumhverfið á Íslandi er nú ekki beinlínis beysið og ef þetta er ung kona, Ísland er ungt og fallegt land, þá eru nú ekki miklir möguleikar fyrir hana að koma aftur undir sig fótunum, þannig að, já, ríkisstjórn Íslands hefur alla vega ekki verið að standa við þau loforð sem hún gaf, heldur þvert á móti,“ segir Steinunn Ólína.

Hún segir ríkisstjórnina hafa róið að því öllum árum að leggja drög að því að setja í gjafakvótakerfi orkuna, vatnið og hafnæði Íslendinga. Ekki hafi verið slegið af þessari stefnu, jafnvel þegar Covid geisaði. Þetta séu vond tíðindi.