Andrés Ingi Jónsson þingmaður Pírata hefur lagt fram skriflega fyrirspurn til heilbrigðisráðherra í nokkrum liðum um HIV-smit á Íslandi. Einfalt er þó að svara fyrsta lið spurningarinnar með hjálp leitarvélarinnar góðkunnu Google. Önnur atriði sem Andrés spyr um eru aðgengileg á heimasíðu HIV-Ísland.
Andrés óskar eftir því að fá svör, í skriflegu formi, við því hvenær fyrsta tilvik HIV-smits greindist á Íslandi. Hversu mörg tilvik HIV greindust frá þeim tímapunkti til ársins 2000 og hversu margir einstaklingar létust af völdum sýkingarinnar. Óskar Andrés eftir því að fá svörin sundurliðuð eftir kyni og ári.
Þegar kemur að fyrsta lið spurningarinnar um hvenær fyrsta tilvik HIV-smits var greint á Íslandi þá kemur það í ljós, þegar þessi spurning er sleginn inn í Google, að þá birtast fréttir fjölmiðla frá alþjóðlegum degi alnæmis, 1. desember, á síðasta ári. Þá var þess minnst að 40 ár voru liðin frá því að fyrsta HIV-smitið var greint á Íslandi. Ljóst er því að þetta var árið 1983.
Mögulega vill Andrés fá nákvæmara svar en eingöngu ártal en nákvæmari dagsetning finnst ekki í fljótu bragði. Öðrum liðum fyrirspurnarinnar ætti sömuleiðis að vera fljótlegt að svara. Við stutta leit á Google kemur það í ljós að á heimasíðu HIV-Ísland eru aðgengilegar ýmsar tölur um HIV-smit á Íslandi. Þessar tölur voru birtar árið 2019 og ná frá fyrsta smitinu árið 1983 fram til þess tíma að þær voru birtar. Eru tölurnar sundurliðaðar eftir ári og kyni.
Þar má meðal annars sjá hversu margir karlar og hversu margar konur greindust með HIV-smit og alnæmi á þessu tímabili og hversu mörg þeirra létust. Til dæmis má nefna að á því tímabili sem Andrés spyr um, 1983-2000, í fyrirspurn sinni létust 30 karlar á Íslandi af völdum alnæmis en 4 konur. Á þessu sama tímabili voru 113 karlar greindir með HIV-smit á Íslandi og 30 konur.
