Það er ekkert að því að vinna heima nokkrum sinnum í mánuði. Þú gætir jafnvel afkastað meiru en kollegi þinn, sem mætir á skrifstofuna alla daga, ef marka má nýja könnun.
Í kjölfar COVID-19 héldu margir að starfsfólk mundi flykkjast á skrifstofuna í unnvörpum. „Um leið var talið að áframhaldandi heimavinna starfsfólks mundi bara draga úr framleiðni. Heimavinnan í COVID-19 væri því aðeins tímabundið ástand og þeir sem væru ekki á skrifstofunni væru bara að svíkjast um! Raunin er nú allt önnur,“ segir Gísli Þorsteinsson sérfræðingur í fjarvinnulausnum hjá Opnum kerfum.
„Kannanir sýna að heimavinnandi fólk er í sumum tilvikum enn afkastameira en þeir sem eru á skrifstofunni, að sögn tölvuframleiðandans HP. Í könnun sem þeir gerðu kemur fram að 77% starfsfólks sem vinnur að heiman nokkrum sinnum í mánuði sýnir fram á aukna afkastagetu,“ segir Gísli.
Gísli Þorsteinsson, viðskipta- og vörustjóri hjá Opnum kerfum.
Betra jafnvægi milli vinnu og einkalífs
Heimavinnan, eða blönduð vinna, dregur einnig úr ferðum til og frá skrifstofu. Hún getur því verið umhverfisvænni og skapað sparnað fyrir starfsmanninn. Þá skilar heimavinnan betra jafnvægi milli vinnu og einkalífs, að sögn Gísla.
„Björninn er þó ekki unninn þó að fólk geti fengið sveigjanleika og unnið annað hvort á skrifstofunni eða að heiman. Margir munu sakna vinnufélaganna. Þá ríður á að fyrirtæki getið boðið starfsfólki viðeigandi lausnir sem henta því óháð staðsetningu. Þarfirnar eru mismunandi og því skipta lausnir sem styðja við blandaða vinnu (e. Hybrid work) höfuðmáli. Það á ekki síst við heyrnartól, tölvubúnað, skjái og jafnvel vefmyndavélar.“
